PF-33 ijrosi: qizlar ta’limi, erta turmushning oldini olish bo‘yicha ota-onalar mas’uliyati va idoralararo hamkorlik kuchaytirilmoqda

Mazkur yig‘ilish Bosh vazir o‘rinbosari — Oila va xotin-qizlar qo‘mitasi raisi Zulayho Maxkamova rahbarligida, respublika va viloyat mas’ullari, mutasaddi idora va tashkilotlar vakillari ishtirokida o‘tkazildi.

Tadbirda erta nikohning har qanday ko‘rinishiga barham berish, nikoh yoshiga yetmagan shaxslar bilan nikoh munosabatlariga kirishish holatlarining oldini olish, maktab bitiruvchi qizlarining keyingi ta’lim bosqichlariga yoki kasb-hunarga yo‘naltirish masalalari muhokama qilindi.

Alohida qayd etilganidek, erta turmush — faqat bir oila yoki bir mahalla doirasidagi masala emas. Bu qiz bolaning ta’limi, salomatligi, ruhiy kamoloti, kelajagi va jamiyatdagi munosib o‘rin egallashiga bevosita ta’sir qiladigan og‘ir ijtimoiy muammodir. Shu bois bunday holatlarga nisbatan befarqlik, har bir xavf omili o‘z vaqtida aniqlanib, manzilli choralar ko‘rilishi zarurligi ta’kidlandi.

Yig‘ilishda xavf guruhidagi oilalar bilan ishlash, farzand taqdiri va kelajagiga ota-onalarning shaxsiy mas’uliyatini kuchaytirish, oilalarda sog‘lom ma’naviy muhitni mustahkamlash hamda maishiy zo‘ravonlikka nisbatan murosasizlik kayfiyatini shakllantirish bo‘yicha vazifalar belgilab olindi.

Shuningdek, murakkab oilaviy sharoitda voyaga yetayotgan, ijtimoiy-huquqiy himoyaga ehtiyoji yuqori bo‘lgan qizlarning xavfsizligini ta’minlash, ularni tazyiq va zo‘ravonlikdan himoya qilish, bunday xavf omillarini barvaqt aniqlash va oldini olish mexanizmlarini kuchaytirish masalasiga alohida e’tibor qaratildi.

Muhokama davomida Chiroqchi, Ko‘kdala va Koson tumanlarida erta nikoh holatlari bilan bog‘liq vaziyatni barqarorlashtirish yuzasidan hududiy mas’ullarga tezkor va kechiktirib bo‘lmaydigan choralar ko‘rish vazifasi yuklatildi.

Shu bilan birga, mahalla, ta’lim, sog‘liqni saqlash, ichki ishlar, adliya, FHDYO, ijtimoiy himoya, diniy soha vakillari hamda oila va xotin-qizlar tizimi o‘rtasida axborot almashinuvi, muvofiqlashtirilgan harakat va natijadorlikni kuchaytirish zarurligi ta’kidlandi.

Yig‘ilishda ota-onalar, keng jamoatchilik vakillari va xalqimizga qaratilgan, erta turmushning oldini olish hamda farzandlar kelajagi oldidagi mas’uliyatni oshirishga da’vat etuvchi Idoralararo murojaat kelishib olindi.

Mazkur yig‘ilish PF-33-son Farmonda belgilangan vazifalarning joylardagi ijrosini kuchaytirish, qizlarning ta’limi, sog‘lig‘i, sha’ni va xavfsizligini himoya qilish hamda jamiyatda sog‘lom, mas’uliyatli va zo‘ravonlikdan xoli oilaviy muhitni qaror toptirishga qaratildi.