Toshkent xalqaro investisiya forumida ayollar tadbirkorligi va gender-inklyuziv iqtisodiy o‘sish masalalari muhokama qilindi

Mazkur sessiya global iqtisodiyotda xotin-qizlarning faol ishtirokini ta’minlash, ayollar tadbirkorligini qo‘llab-quvvatlash, ularning moliyaviy resurslar, investisiya va bozor imkoniyatlariga kirishini kengaytirish hamda gender-inklyuziv iqtisodiy o‘sishni ta’minlash masalalariga bag‘ishlandi.

Tadbirni O‘zbekiston Respublikasi Bosh vaziri o‘rinbosari — Oila va xotin-qizlar qo‘mitasi raisi Zulayho Maxkamova kirish so‘zi bilan ochib berdi.
Ta’kidlanganidek, so‘nggi yillarda mamlakatimizda xotin-qizlarning iqtisodiy faolligini oshirish, ularni tadbirkorlikka keng jalb etish, kasb-hunar va zamonaviy bilimlarga o‘qitish, moliyaviy mustaqilligini mustahkamlash hamda ishbilarmon ayollar safini kengaytirish davlat siyosatining muhim yo‘nalishlaridan biriga aylandi. Bu borada xotin-qizlar bandligini ta’minlash, ularning biznes tashabbuslarini qo‘llab-quvvatlash, imtiyozli moliyaviy mexanizmlardan foydalanish imkoniyatlarini oshirish hamda hududlarda ayollar tadbirkorligi uchun qulay muhit yaratishga alohida e’tibor qaratilmoqda.

Zulayho Maxkamova o‘z nutqida ayollar tadbirkorligi faqat oila daromadini oshirish yoki bandlikni ta’minlash vositasi emas, balki iqtisodiyotda yangi ish o‘rinlari yaratish, mahalliy mahsulotlar raqobatbardoshligini kuchaytirish, hududlarda ijtimoiy barqarorlikni mustahkamlash va inklyuziv taraqqiyotga erishishning muhim omillaridan biri ekanini qayd etdi.

Shu nuqtai nazardan, ayollarning iqtisodiy salohiyatini yuzaga chiqarish, ularni kichik biznesdan o‘rta va yirik tadbirkorlik bosqichiga olib chiqish, eksport salohiyatiga ega loyihalarini qo‘llab-quvvatlash hamda xalqaro moliya institutlari bilan amaliy hamkorlikni kengaytirish dolzarb vazifalardan biri sifatida belgilandi.

Panel sessiyasiga “BMT-Ayollar” tashkilotining Markaziy Osiyo bo‘yicha aloqalar rahbari doktor Seren Gyuven Gyuresh moderatorlik qildi. Muloqot davomida xalqaro moliya institutlari, nufuzli tashkilotlar, xususiy sektor va davlat idoralari vakillari ishtirokida ayollar tadbirkorligini rivojlantirishning amaliy jihatlari atroflicha muhokama qilindi.

Sessiyada Xalqaro moliya korporatsiyasining sanoat bo‘yicha mintaqaviy direktori Momina Aydjazuddin, Osiyo taraqqiyot bankining O‘zbekistondagi direktori Kanokpan Lao-Araya, Vengriyaning sobiq prezidenti Katalin Novak, ACWA Power kompaniyasining O‘zbekiston bo‘yicha bosh menejeri doktor Jon Zaidi, KFW Ipex-Bank GmbHning Sharqiy Yevropa, Markaziy Osiyo va Janubiy Kavkaz bo‘yicha bo‘lim rahbari Yekaterina Galisina, BMTTDning O‘zbekistondagi rezident vakili o‘rinbosari Anas Fayyad Karman, “Hamroh” ayollar tadbirkorligini qo‘llab-quvvatlash kompaniyasi bosh direktori Dilfuza Nurmatova hamda Bojxona qo‘mitasi Raisining maslahatchisi Umida Pirmuhamedova o‘z ma’ruzalari bilan ishtirok etdilar.

Muhokamalarda gender yondashuviga asoslangan investisiyalarning iqtisodiy samarasi, rivojlanayotgan bozorlarda ayollar tadbirkorligi uchun mavjud imkoniyat va to‘siqlar, moliyalashtirish manbalariga kirish, biznesni kengaytirish, eksport jarayonlarida xotin-qizlar ishtirokini oshirish hamda inklyuziv o‘sishning mamlakat yalpi ichki mahsulotiga ta’siri kabi masalalarga alohida e’tibor qaratildi.

Xalqaro ekspertlar ta’kidlaganidek, ayollar tadbirkorligini qo‘llab-quvvatlash iqtisodiy o‘sishning muhim zaxiralaridan biridir. Xotin-qizlar tashabbuslariga yo‘naltirilgan investisiyalar nafaqat yangi biznes loyihalarni shakllantiradi, balki mehnat bozorida barqaror bandlikni ta’minlaydi, oila farovonligini oshiradi, hududlarda ijtimoiy-iqtisodiy faollikni kuchaytiradi.

Shu bilan birga, ishtirokchilar ayollar tadbirkorligini rivojlantirishda hali yechimini kutayotgan qator masalalar mavjudligini ham qayd etdilar.

Xususan, moliyaviy savodxonlikni oshirish, garov ta’minoti bilan bog‘liq qiyinchiliklarni yengillashtirish, biznesni boshlash va kengaytirish bo‘yicha maslahat xizmatlarini kuchaytirish, raqamli ko‘nikmalarni rivojlantirish, xalqaro bozorlarga chiqish uchun amaliy ko‘mak mexanizmlarini takomillashtirish zarurligi ta’kidlandi.

Panel sessiyasida davlat organlari, xalqaro tashkilotlar va xususiy sektor o‘rtasidagi hamkorlik ayollar tadbirkorligini yangi bosqichga olib chiqishda muhim ahamiyat kasb etishi qayd etildi. Ayniqsa, mahalliy tadbirkor ayollarning investisiya loyihalari bilan xalqaro moliya institutlari va yirik kompaniyalar o‘rtasida bevosita muloqot maydonlarini kengaytirish, tajriba almashish va sheriklik aloqalarini yo‘lga qo‘yish bugungi kun talabiga aylanmoqda.
Tadbirda Oila va xotin-qizlar qo‘mitasining mas’ul xodimlari, O‘zbekistonning turli hududlaridan tashrif buyurgan 150 nafardan ortiq tadbirkor ayollar, xalqaro ekspertlar, moliya institutlari va xususiy sektor vakillari ishtirok etdi. Bu esa sessiyaning nafaqat nazariy muhokama, balki ayollar tadbirkorligi uchun yangi hamkorliklar, amaliy tashabbuslar va istiqbolli loyihalarga yo‘l ochuvchi muloqot maydoni sifatida muhim ahamiyatga ega bo‘lganini ko‘rsatdi.
Muhokamalar yakunida ayollar tadbirkorligini qo‘llab-quvvatlash, gender-inklyuziv investisiyalarni kengaytirish, xotin-qizlarning moliyaviy resurslardan foydalanish imkoniyatlarini oshirish hamda barqaror iqtisodiy o‘sishni ta’minlashda davlat organlari, xususiy sektor va xalqaro moliya institutlari o‘rtasidagi hamkorlikni yanada kuchaytirish muhim ekani ta’kidlandi.

Ma’lumot uchun, Toshkent xalqaro investisiya forumi 2022 yildan buyon O‘zbekiston Respublikasi Investisiyalar, sanoat va savdo vazirligi tomonidan o‘tkazib kelinayotgan Markaziy Osiyodagi eng yirik investisiya maydonlaridan biri hisoblanadi. 2026 yil 16–18 iyun kunlari Toshkent shahrida beshinchi, yubiley forum “Investisiyalar barqarorligi: yangi ufqlar, yangi sheriklik” shiori ostida tashkil etilmoqda. Forumda dunyoning 100 ta mamlakatidan minglab xorijiy delegatlar, yirik kompaniyalar, xalqaro moliya institutlari va davlat idoralari vakillari ishtirok etmoqda. Anjuman doirasida panel munozaralari, investision pitch-sessiyalar, ikki tomonlama biznes-forumlar, davra suhbatlari va amaliy uchrashuvlar o‘tkazilishi belgilangan.