Narpay tumanida lider tadbirkor ayollar bilan uchrashuv bo‘lib o‘tdi

Narpay tumanida Bosh vazir o‘rinbosari - Oila va xotin-qizlar qo'mitasi raisi Zulayho Maxkamova hamda viloyat hokimi o‘rinbosari - Oila va xotin-qizlar boshqarmasi boshlig‘i Zebo Saidova ishtirokida hududdagi lider tadbirkor ayollar bilan uchrashuv tashkil etildi.

Uchrashuv davomida xotin-qizlar tadbirkorligini yanada rivojlantirish, ularning iqtisodiy faolligini qo‘llab-quvvatlash, mavjud muammo va takliflarini o‘rganish masalalariga alohida e’tibor qaratildi. Tadbirkor ayollar o‘z faoliyati jarayonida duch kelayotgan muammolar, biznesni kengaytirish, moliyaviy ko‘mak, kredit, bandlik va bozor imkoniyatlari yuzasidan o‘z fikr-mulohazalarini bildirdilar.

Ko‘tarilgan har bir masala atroflicha muhokama qilinib, ularni hal etish bo‘yicha tegishli mutasaddilarga aniq topshiriqlar berildi. Shuningdek, ayrim murojaatlar yuzasidan amaliy yordam ko‘rsatilib, tadbirkor ayollarning tashabbuslarini qo‘llab-quvvatlash muhim ekani ta’kidlandi.

Mazkur uchrashuv xotin-qizlarning tadbirkorlik salohiyatini ro‘yobga chiqarish, ularning jamiyatdagi faolligini oshirish va oilalar farovonligini ta’minlashga xizmat qiluvchi muhim muloqot maydoni bo‘ldi.