O‘quv-amaliy seminar ilg‘or pillakor xonadonida o‘tkazildi

Davlat rahbarining 2026-yil 6-martdagi “Ipakchilik sohasini yangi tizim asosida rivojlantirish hamda ozuqa bazasini mustahkamlashga doir qo‘shimcha chora-tadbirlar to‘g‘risida” gi qarori ijrosini ta’minlash maqsadida tashkil etilgan o‘quv-amaliy seminar tumanning Usmon Yusupov mahallasida istiqomat qiluvchi tajribali pillakor Oyxol Musayeva xonadonida o‘tkazildi.

Seminarda tumanlarda faoliyat yuritayotgan tajribali va yetakchi pillakorlar, pilla inkubatoriyalari rahbarlari, tuman hokimlarining oila va xotin-qizlar masalalari bo‘yicha o‘rinbosarlari, aholini bandligini ta’minlash va kambag‘allikni qisqartirish bo‘yicha mas’ul mutaxassislar qatnashishdi.

Shuningdek, tadbirda O‘zbekiston Respublikasi Bosh vaziri o‘rinbosari, Oila va xotin-qizlar qo‘mitasi raisi Zulayxo Mahkamova ishtirok etib, Prezident qarorida belgilangan vazifalarning mazmun-mohiyati, pillachilik tarmog‘ini yangi bosqichga olib chiqish borasida amalga oshirilayotgan chora-tadbirlar haqida fikr bildirdi.  

Ta’kidlanganidek, pillachilik qishloq joylarda aholi bandligini ta’minlash, oilalar daromadini oshirish hamda mamlakatning eksport salohiyatini kengaytirishda muhim o‘rin tutadi.

– Seminar davomida pilla yetishtirishda hosildorlikni oshirishning ilmiy asoslangan usullari, zamonaviy texnologiyalarni amaliyotga joriy etish, ozuqa bazasini mustahkamlash hamda pilla parvarishidagi ilg‘or tajribalar haqida amaliy tavsiyalar berildi,  – deydi tuman hokimining xotin-qizlar masalalari bo‘yicha o‘rinbosari, Oila va xotin-qizlar bo‘limi boshlig‘i Mehriniso Eshonxonova.

Eng muhimi, o‘tkazilgan o‘quv-amaliy seminar davomida tajribali pillakorlar o‘z faoliyati davomida orttirgan bilim va tajribalari bilan o‘rtoqlashib, soha rivoji uchun muhim bo‘lgan amaliy masalalar yuzasidan fikr almashdilar.

Ayniqsa, mahallalardagi xotin-qizlarni pillachilikka keng jalb etish, ularni doimiy va mavsumiy daromad manbai bilan ta’minlash, shu orqali oilalar farovonligini oshirish masalasiga alohida e’tibor qaratildi. Qayd etilganidek, pillachilik tarmog‘ini rivojlantirish nafaqat iqtisodiy samara beradi, balki aholining bandligini ta’minlash va kambag‘allikni qisqartirishda ham muhim omil bo‘lib xizmat qiladi.

Shuningdek, seminar ishtirokchilariga Prezidentning “Ipakchilik sohasini yangi tizim asosida rivojlantirish hamda ozuqa bazasini mustahkamlashga doir qo‘shimcha chora-tadbirlar to‘g‘risida”gi qarori asosida pillachilik sohasiga yaratilayotgan imtiyozlar, moliyaviy ko‘maklar va bank kreditlaridan samarali foydalanish imkoniyatlari haqida tushuntirishlar berildi.

Tadbir doirasida Zulayxo Mahkamova Boyovut tumanidagi 2-son kasb-hunar kollejida fuqarolar uchun sayyor qabul ham o‘tkazdi. Qabulda tuman tashkilotlari rahbarlari va mas’ul mutasaddilar ishtirok etishib, aholi murojaatlarini tinglashdi.

Sayyor qabul jarayonida xotin-qizlarni qiynab kelayotgan ijtimoiy muammolar, ishga joylashtirish, tadbirkorlik faoliyatini yo‘lga qo‘yish uchun kredit olish, ijtimoiy yordam, salomatlikni tiklash hamda uy-joy ta’miri bilan bog‘liq masalalar yuzma-yuz muhokama qilindi. E’tiborli jihati shundaki, ko‘tarilgan murojaatlarning aksariyati tegishli tashkilot rahbarlari tomonidan shu joyning o‘zida o‘rganilib, ijobiy hal etildi. Qo‘shimcha o‘rganish talab etadigan masalalar bo‘yicha esa aniq muddatlar belgilanib, mas’ullarga tegishli topshiriqlar berildi.