Farg’onada “Oila va nikoh – muqaddas" forumi bo’lib o’tdi

Respublika Oila va xotin-qizlar qo‘mitasi, Farg‘ona viloyati hokimligi hamda viloyat Oila va xotin-qizlar boshqarmasi hamkorligida Farg‘ona viloyati Axborot-kutubxona markazida “Oila va nikoh – muqaddas” mavzusida o‘quv-seminar tashkil etildi.

Seminarda Oila va xotin-qizlar qo‘mitasi hamda tizimning viloyat, tuman va shahar bo‘limlari rahbarlari, Adliya vazirligining FHDYO organlari faoliyatini muvofiqlashtirish va nazorat qilish bo‘limi mutaxassislari, Oila va gender ilmiy-tadqiqot instituti vakillari, viloyat sudi, viloyat bosh imom-xatibi, otinoyilar, viloyat “Nuroniy” jamg‘armasi, viloyat Sog‘liqni saqlash boshqarmasi, shuningdek, OAV vakillari ishtirok etdi.

Seminarni Bosh vazir o‘rinbosari — Oila va xotin-qizlar qo‘mitasi raisi Zulayho Mahkamova kirish so‘zi bilan ochib berdi. U o‘quv-seminarning asosiy maqsadi oilaning tinchligi va farovonligini ta’minlash, mustahkam oilani shakllantirish, nizoli oilalar bilan manzilli ishlash orqali muammolarni o‘z vaqtida bartaraf etish, erta nikoh va erta tug‘ruq, shuningdek, noqonuniy nikohlarning oldini olishga qaratilgan tizimli hamkorlikni yanada kuchaytirishdan iborat ekanini ta’kidladi.

Shuningdek, nikohni qayd etish jarayonida nikoh shartnomasining afzalliklari, migratsiya omillari, huquq-tartibot idoralari, adliya va diniy tashkilotlar, ta’lim tizimi bilan hamkorlikda milliy qadriyatlarimizga tayangan holda huquqiy va tarbiyaviy ahamiyatga ega targ‘ibot ishlarini kengaytirish ustuvor yo‘nalishlar sifatida qayd etildi. Bosh vazir o‘rinbosari o‘z so‘zi yakunida tinchlik va osoyishtalik hukm surgan yurtda farovonlik mustahkam bo‘lishini, oilalar baxtli, xotin-qizlar hayotdan rozi yashashi uchun davlat idoralari va jamoatchilik birgalikda mas’uliyatli hamkorlikda ishlashi zarurligini alohida urg‘uladi.

O‘quv-seminar doirasida oilaviy ajrimlarning sabablari va ularning oldini olish chora-tadbirlari, nikohlar soni kamayishining statistik tahlili, oilalarni mustahkamlashda fuqarolik sudlari tomonidan amalga oshirilayotgan ishlar, oila barqarorligini ta’minlashda imom-xatiblar, otinoyilar hamda davlat va nodavlat tashkilotlarining hamkorligi, reproduktiv salomatlik, ona va bola salomatligini muhofaza qilish kabi mavzularda soha mutaxassislari ma’ruzalari tinglandi.

Seminar yakunida viloyat hokimi o‘rinbosari Komila Kavlonova so‘zga chiqib, viloyatda oila mustahkamligini ta’minlash, xotin-qizlarning jamiyatdagi o‘rni va faolligini oshirishga qaratilgan taklif va tavsiyalar uchun hamkor tashkilotlar vakillariga minnatdorlik bildirdi.