O‘zbekiston va Pokiston qishloq xo‘jaligi sohasida hamkorlikni kengaytirmoqda

Tadbir doirasida savdo-iqtisodiy aloqalar bilan bir qatorda qishloq xo‘jaligi va oziq-ovqat xavfsizligi sohalaridagi hamkorlik masalalari ham atroflicha muhokama qilindi. Yig‘ilishda qishloq xo‘jaligi vaziri o‘rinbosari J. Abduzuxurov, Veterinariya va chorvachilik qo‘mitasi raisi o‘rinbosari A. Akbarov hamda O‘simliklar karantini va himoyasi agentligi raisi o‘rinbosari U. Yunusov ishtirok etdi.

Muzokaralar davomida tomonlar 2025-yil 18-dekabr kuni imzolangan muhim hujjatni alohida qayd etdilar. Mazkur Bayonnoma O‘zbekistondan Pokistonga iste’mol uchun mo‘ljallangan anor, uzum va olxo‘rini eksport qilish bo‘yicha fitosanitariya talablarini belgilab beradi. Ushbu kelishuv ikki davlat o‘rtasidagi meva-sabzavot savdosini kengaytirish yo‘lidagi muhim qadam sifatida baholandi.

Shuningdek, tomonlar O‘zbekistondan Pokistonga yangi olma, anjir, limon hamda achchiq qalampir eksportini yo‘lga qo‘yish bo‘yicha fitosanitariya talablari to‘g‘risidagi navbatdagi Bayonnomani imzolashga tayyor ekanliklarini bildirdilar.

Muhokamalar yakunida fitosanitariya sohasidagi hamkorlikni tizimli yo‘lga qo‘yish maqsadida Qo‘shma ishchi guruh tuzishga kelishib olindi. Ushbu guruh meva-sabzavot mahsulotlari bo‘yicha bozorga o‘zaro kirishni kengaytirish, axborot almashinuvini kuchaytirish hamda texnik masalalarni muvofiqlashtirish bilan shug‘ullanadi.

Bundan tashqari, chorvachilik yo‘nalishidagi hamkorlikni rivojlantirish masalalariga ham alohida e’tibor qaratildi. Shu maqsadda tomonlar Texnik ishchi guruh tuzishga kelishib oldilar va Pokiston tomonidan taklif etilgan guruh tarkibini ma’lumot uchun qabul qildilar.