Mahallalarda xavfsiz muhitni ta’minlashda samarali yondashuv

Mazkur yo‘nalishda olib borilayotgan ishlarning amaliy samarasi sifatida 2025-yilda mahallalarda jinoiy holatlarning qariyb 1,5 baravar kamayishiga erishilgani davlat siyosatining natijadorligini yaqqol namoyon etdi. Shu bilan birga, oila-turmush munosabatlari doirasida, ayniqsa ayollar va yoshlar ishtirokida sodir etilayotgan huquqbuzarliklarning ildiz omillarini chuqur tahlil qilish va ularga nisbatan manzilli ta’sir choralarini kuchaytirish dolzarb vazifa bo‘lib qolmoqda.

Bosh vazir o‘rinbosari — Oila va xotin-qizlar qo‘mitasi raisi Zulayho Maxkamova boshchiligida Chilonzor tumanidagi “Beshqo‘rg‘on” mahallasida shakllantirilayotgan tajriba mahallalarda xavfsiz muhitni ta’minlashga qaratilgan yangi yondashuvlar uchun muhim amaliy asos bo‘lib xizmat qilmoqda.

Tashrif davomida mahallada jamoat xavfsizligini mustahkamlash, ijtimoiy muhitni barqarorlashtirish, aholi turmush sifatini yaxshilash hamda profilaktik ishlar samaradorligini oshirishga qaratilgan kompleks chora-tadbirlar o‘rganildi. Mas’ul idora va tashkilotlar o‘rtasidagi hamkorlikni kuchaytirish, aholi bilan manzilli ishlash orqali xavfsiz va sog‘lom muhit yaratish masalalari muhokama qilindi.

“Beshqo‘rg‘on” mahallasi misolida ijtimoiy profilaktikani “ilmiy tahlil — manzilli chora — aniq natija” tamoyili asosida tashkil etish, nizoli va ijtimoiy xavf guruhiga kiruvchi oilalar bilan individual ishlash, ayollar jinoiy holatlari va oilaviy nizolarning kelib chiqish sabablarini barvaqt aniqlash bo‘yicha o‘ziga xos model shakllantirilmoqda. Mazkur tajribani namunaviy model sifatida boshqa hududlarda ham joriy etish bo‘yicha aniq vazifalar belgilandi.

Prezidentning PQ-1 va PQ-2-son qarorlariga muvofiq, Oila va xotin-qizlar qo‘mitasi zimmasiga ayollar jinoyatchiligi hamda oilaviy nizolar profilaktikasini tizimli tashkil etish, kriminogen vaziyati og‘ir mahallalarda manzilli biriktirish asosida ishlash, “E-ijtimoiy profilaktika” axborot tizimi orqali monitoring va nazoratni kuchaytirish kabi muhim vazifalar yuklatilgan.

Xususan, ayollar jinoiyligi va nizoli oilalar ko‘rsatkichi yuqori bo‘lgan mahallalarni hududiy rahbarlarga biriktirish, individual reabilitatsiya va ijtimoiy moslashuv dasturlarini amalga oshirish, idoralararo hamkorlikni muvofiqlashtirish orqali oilaviy muammolarni barvaqt bartaraf etish ustuvor yo‘nalish sifatida belgilangan.

Mazkur qarorlar ijrosi doirasida olib borilayotgan tizimli ishlar natijasida mahallalarda ijtimoiy adolat va xavfsizlikka asoslangan sog‘lom muhit shakllanishi, oila barqarorligi mustahkamlanishi, ayollar va yoshlar o‘rtasida huquqbuzarliklar keskin qisqarishi kutilmoqda.

Umuman olganda, “Beshqo‘rg‘on” mahallasi tajribasi Oila va xotin-qizlar qo‘mitasining mahallalarda ijtimoiy profilaktikani samarali tashkil etish, xavfsiz muhitni ta’minlash va aholi roziligiga erishish borasidagi faoliyatida muhim amaliy model bo‘lib xizmat qilmoqda.