Xotin-qizlar tadbirkorligi yanada rivojlanadi

O‘zbekiston Respublikasi Bosh vaziri o‘rinbosari Zulayho Mahkamova ishtirokida o‘tkazilgan muloqotda viloyat Oila va xotin-qizlar, Bandlikka ko‘maklashish va kambag‘allikni qisqartirish boshqarmalari, ularning tuman, shahar bo‘limlari, mutasaddi tashkilotlar rahbarlari, mutaxassislar, tadbirkor, hunarmand hamda faol xotin-qizlar qatnashdi.   

Muloqotda Prezidentimiz tashabbusi bilan aholini kambag‘allikdan chiqarish va daromadini oshirish borasidagi sa’y-harakatlar ana shu yo‘nalishdagi ishlarni yanada yuqori bosqichga ko‘tarishga keng imkoniyatlar yaratib berayotganligi ta’kidlandi.   

Tadbirda xotin-qizlar tadbirkorligini rivojlantirish, kambag‘allikni qisqartirish masalalari, ana shu yo‘nalishlarda olib borilayotgan ishlar, yutuq va muammolar atroflicha muhokama etildi.   

Milliy hunarmandchilik, asalarichilik, tomorqadan unumli foydalanish, xizmat ko‘rsatish sohalari imkoniyatlaridan kengroq foydalanish, xotin-qizlarni tadbirkorlikka o‘qitish, bilim va malakalarini oshirish bo‘yicha taklif va tavsiyalar berildi.   

Aytish joizki, viloyatdagi mahallalarda oilaviy tadbirkorlikni yo‘lga qo‘yish, xotin-qizlar tadbirkorligini rivojlantirish, aholi, ayniqsa, ayollar bandligini ta’minlash, shu orqali ularning doimiy daromad manbaini shakllantirish, kambag‘allikni qisqartirishga qaratilgan keng ko‘lamli ishlar amalga oshirilmoqda. 

Xususan, ishsiz aholi bandligini ta’minlash va kambag‘al oilalarning daromadlarini oshirish bo‘yicha “Ishsizlikdan xoli hududga aylantirish” biznes dasturi ishlab chiqilib, ana shu asosda viloyatdagi barcha mahallalarda amaliy ishlar olib borilmoqda. Dastur doirasida 1 ming 66 nafar fuqaroga subsidiya, 10 ming 761 nafar fuqaroga kreditlar ajratilgan. Bundan tashqari, 21 ming 993 nafar fuqaro o‘zini-o‘zi band qilgan, 10 ming 172 nafar fuqaro esa ishga joylashtirilgan. Subsidiya, kredit berilgan hamda ishga joylashtirilganlarning asosiy qismini xotin-qizlar tashkil etadi.   

– Markazimiz tomonidan birgina o‘tgan yil davomida “Ayollar daftari”, “Yoshlar daftari”ga kiritilgan, tadbirkorlik qilish yoki kasb-hunar o‘rganish istagidagi 5 ming nafarga yaqin xotin-qiz o‘quv kurslarimizda o‘qitildi, – deydi Andijon viloyati Xotin-qizlar tadbirkorlik markazi rahbari Muqaddasxon Karimova. – Kurslarni muvaffaqiyatli tamomlagan 970 nafar xotin-qiz taqdim etilgan subsidiyalar asosida tikuv mashinalari va boshqa dastgohlar olib, o‘zini o‘zi band qildi. Shuningdek, ularning 525 nafariga 1 milliard 500 million so‘mdan ziyod imtiyozli kredit olishiga ko‘maklashildi. Norasmiy faoliyat yuritayotgan 50 nafar hunarmand ayolga ro‘yxatdan o‘tish, «Hunarmand» uyushmasiga a’zo bo‘lishi uchun amaliy yordam ko‘rsatildi. Bu kabi ishlar joriy yilda ham reja asosida izchil davom ettirilmoqda.  

Muloqotda Bosh vazir o‘rinbosari xotin-qizlarning taklif, tashabbus, muammo va turli masalalardagi murojaatlarini eshitdi. Muammolarni hal etish, taklif va tashabbuslarni qo‘llab-quvvatlash bo‘yicha mas’ul va mutasaddilarga topshiriqlar berdi.   

Shuningdek, viloyatda mazkur yo‘nalishdagi ishlarni yanada yuqori bosqichga ko‘tarish, joylarda, ayniqsa, chekka hududlarda tadbirkor ayollar safini kengaytirish, ularning samarali faoliyat yuritishi uchun zarur shart-sharoitlar, qo‘shimcha imkoniyatlar yaratib berish, tijorat banklari bilan yaqin hamkorlikni yo‘lga qo‘yish yuzasidan  mutasaddilarga vazifalar belgilab berildi.   

Bosh vazir o‘rinbosari Zulayho Mahkamova tadbir doirasida tashkil etilgan hunarmandchilik mahsulotlari ko‘rgazmasi bilan ham tanishdi.