Xotin-qizlarni ijtimoiy qo‘llab-quvvatlashda yangi hamkorlik mexanizmlari joriy etilmoqda

Memorandum Bosh vazir o‘rinbosari — Oila va xotin-qizlar qo‘mitasi raisi Zulayho Maxkamova hamda Oliy Majlisi huzuridagi Fuqarolik jamiyati institutlarini qo‘llab-quvvatlash jamoat fondi direktori Otabek Husanov tomonidan xotin-qizlarning huquq va manfaatlarini himoya qilish, ularni ijtimoiy-iqtisodiy jihatdan qo‘llab-quvvatlash, fuqarolik jamiyati institutlari bilan samarali hamkorlikni rivojlantirish, tomonlarning vakolatlari doirasida o‘zaro konstruktiv va manfaatli aloqalarni mustahkamlash maqsadida imzolandi.

Hujjat doirasida 2026–2027 yillarda amalga oshiriladigan hamkorlik chora-tadbirlari rejasi tasdiqlanib, unda xotin-qizlar bandligini ta’minlash, tadbirkorlik tashabbuslarini qo‘llab-quvvatlash, ijtimoiy himoyaga muhtoj ayollar bilan manzilli ishlash, oilaviy zo‘ravonlikning oldini olish, huquqiy va psixologik yordam ko‘rsatish kabi muhim yo‘nalishlar belgilab olindi.

Shuningdek, mahallalarda ijtimoiy sheriklikni kuchaytirish, nodavlat notijorat tashkilotlari bilan hamkorlikda innovasion loyihalarni amalga oshirish, ilg‘or tajribalarni ommalashtirish hamda xotin-qizlarni har tomonlama qo‘llab-quvvatlash mexanizmlarini yanada takomillashtirish masalalariga alohida e’tibor qaratildi.

Mazkur hamkorlik kelgusi yillarda davlat va fuqarolik jamiyati institutlari o‘rtasidagi o‘zaro aloqalarni mustahkamlash, xotin-qizlarning jamiyatdagi faolligini oshirish hamda ularning ijtimoiy-iqtisodiy imkoniyatlarini kengaytirishda muhim ahamiyat kasb etadi.