Ayolning mehnati, tashabbusi va izlanishi — oilaviy farovonlikning muhim omili
2026-11-09 14:10:00 / Yangiliklar

Mirzacho‘l tumani Bog‘bon mahallasining Afrosiyob ko‘chasida yashovchi Nargiza Qobilova o‘z mehnati va tashabbusi bilan bir nechta yo‘nalishda faoliyat yuritmoqda. U gulchilik, bedanachilik hamda parda tikish va tayyorlash ishlarini yo‘lga qo‘ygan.
Nargiza Qobilovaning gulchilik faoliyati alohida e’tiborga molik. Issiqxona sharoitida turli manzarali gullar parvarishlanib, ularning rang-barangligi va ko‘rkamligi atrofdagilarga estetik zavq bag‘ishlaydi. Gullarni yetishtirish sabr-toqat, doimiy parvarish va mas’uliyat talab etadi.
Tadbirkorlik faoliyatining yana bir yo‘nalishi — bedanachilik. Maxsus jihozlangan joyda bedanalar parvarishlanmoqda. Bu yo‘nalish ham o‘ziga xos mehnat va e’tibor talab qiladigan faoliyatlardan biridir.
Shuningdek, Nargiza Qobilova parda tikish va tayyorlash bilan ham shug‘ullanadi. Bir-biridan farqli uch yo‘nalishdagi faoliyat uning izlanishga, yangi imkoniyatlardan foydalanishga va o‘z mehnati bilan daromad topishga intilishini namoyon etadi.
Bugun xotin-qizlarning tadbirkorlik bilan shug‘ullanishi, kasb-hunar egallashi va iqtisodiy hayotda faol ishtirok etishi gender tenglik tamoyillarining amaliy ifodasidir. Nargiza Qobilovaning faoliyati ham ayollar uchun imkoniyatlar kengayib borayotganining mahalladagi hayotiy misollaridan biridir.
Zero, ayolning tashabbusi qo‘llab-quvvatlangan joyda yangi ishlar, yangi imkoniyatlar va farovonlik sari intilish kuchayadi.
Mirzacho‘l tumani hokimligi Axborot xizmati
