Sizlarni yurtimizda amalga oshirilayotgan islohotlarda faol ishtirok etayotganingiz uchun minnatdorlik bildirgan holda, barchangizga tinchlik-osoyishtalik, sog‘lik-salomatlik va oilalaringizga farovonlik tilayman.

Joriy yilning o‘tgan 9 oyi davomida Mirzacho‘l tumani Ichki ishlar bo‘limi tomonidan jamoat tartibini saqlash, jinoyatchilikka qarshi kurashish, huquqbuzarliklarning barvaqt oldini olish hamda aholining tinch va osoyishta hayotini ta’minlash borasida kompleks chora-tadbirlar amalga oshirildi.

2026 yilning 9 oyi davomida tuman hududida 115 ta jinoyat sodir etilgan bo‘lib, shundan 43 tasi aniqlangan jinoyatni, 12 tasi oldi olinishi lozim bo‘lgan jinoyatlarni, 60 tasi axborot texnologiyasi sohasidagi jinoyatlarni tashkil qiladi. Sodir etilgan jinoyatlarning asosiy salmog‘i ya’ni 52 foizi axborot texnologiyasi sohasidagi jinoyatlardir.

Kiber jinoyatlar ortib borayotgani ushbu yo‘nalishda aholining ogohligini oshirish va axborot xavfsizligi qoidalariga qat’iy rioya qilishni talab etmoqda. Shu maqsadda targ‘ibot-tashviqot ishlari, profilaktik uchrashuvlar va amaliy seminarlar muntazam tashkil etilmoqda.

Shu bilan birga, jinoyatchilikni oldini olishda fuqarolarning shaxsiy ehtiyotkorligi ham muhim ahamiyatga ega.

Ayniqsa, ayrim hollarda fuqarolar tomonidan o‘zlariga tegishli bo‘lgan mol-mulkni qarovsiz qoldirish holatlari kuzatilmoqda. Bu esa turli jinoyat va huquqbuzarliklarning sodir etilishiga sharoit yaratishi mumkin.

Shu munosabat bilan, barcha fuqarolardan:
o‘z uy-joylari, avtomashinalari va boshqa mol-mulklarini qarovsiz qoldirmaslikni;
-  uydan chiqishda eshik-romlarni ishonchli yopishni;
-  qimmatbaho buyumlarni nazoratsiz qoldirmaslikni;
-  notanish shaxslarga mol-mulkni ishonib topshirmaslikni;
- qo‘shnilar va mahalla bilan hamjihatlikda xavfsizlikni ta’minlashni qat’iy so‘rab qolamiz.
Jinoyatchilikni barvaqt oldini olish maqsadida mahallalarda profilaktik ishlar kuchaytirildi, huquqbuzarlikka moyil shaxslar bilan manzilli ishlash tizimi yo‘lga qo‘yildi.

Hurmatli fuqarolar!

Jamoat xavfsizligini ta’minlash va jinoyatchilikka qarshi kurashish barchamizning umumiy vazifamiz hisoblanadi. Ayniqsa, kiber makonda va kundalik hayotda ogohlikni oshirish, shaxsiy xavfsizlik qoidalariga rioya etish orqali ko‘plab salbiy holatlarning oldini olish mumkin.

Sizlarni har qanday huquqbuzarlik holatlari, jumladan kiber jinoyatlar haqida zudlik bilan ichki ishlar organlariga xabar berishga chaqiraman.

Birgalikdagi sa’y-harakatlarimiz orqali shahrimizda tinchlik va osoyishtalikni ta’minlay olamiz.