Hurmatli Yurtboshimiz rahbarligida, mas’ul idora va tashkilotlar hamda vatanparvar xalqimiz bilan birgalikda barcha sohalarda, xususan Mirzacho‘l tumanida qonuniylikni mustahkamlash, jinoyatchilikka qarshi kurashish borasida muayan ishlar amalga oshirib kelinmoqda.

Ko‘rilgan choralar natijasida tumanimizda 2026-yilning o‘tgan 9 oyi davomida 12 ta oldini olish mumkin bo‘lgan jinoyatlar sodir etilgan bo‘lib, o‘tgan yilning shu davriga nisbatan 3 taga kamaygan.

Oilalardagi muhitni yaxshilash, yoshlar ayniqsa, xotin - qizlarning muammolarini o‘rganib, hal etishga alohida e’tibor qaratilmayotganligi sababli tumanimizda xotin - qizlar tomonidan 1 ta jinoyat sodir etilgan.

Bundan tashqari, ayrim fuqarolarimizning beparvoligi oqibatida o‘zlariga tegishli mol – mulklar, texnika vositalari, chorva mollari yoki uy atroflarini qarovsiz qoldirgani oqibatida o‘g‘rilik jinoyatlari sodir etilishiga imkoniyat yaratib berayotgani ham ayni haqiqat.

Buning oqibatini tumanimizda 5 ta o‘g‘rilik jinoyatlari qayd etilganidan ko‘rishimiz mumkin.

Shuningdek, yo‘llarda avtomashinalar soni kundan - kunga ortib, haydovchilarning mas’uliyatini oshirmoqda.

Biroq, ayrim haydovchilar yo‘l belgilari, yo‘l qoidalariga rioya etmasdan o‘zboshimchalik bilan tezlikni oshirgani  yoki haydovchilik guvohnomasi yo‘q fuqarolarga avtomashinani boshqarishga noqonuniy ruxsat bergani natijasida o‘lim bilan bog‘liq 1 ta yo‘l - transport hodisasi sodir etilganligi ayanchli, albatta!

Shu bilan birga, raqamli texnologiya vositalari orqali fuqarolarni aldash va ularning mol - mulkini egallash holatlari ko‘paymoqda.

Keyingi vaqtlarda bank kartalaridan foydalangan holda o‘g‘rilik yoki firibgarlik holatlarining ko‘payishi tumanimiz aholisining raqamli moliyaviy savodxonligi darajasi yetarli emasligini ko‘rsatmoqda.

2026-yilning o‘tgan 9 oyi davomida 60 ta kiberjinoyatlar sodir etilib, shundan 32 tasi o‘g‘rilik va 28 ta firibgarlik holatlari bo‘yicha jinoyat ishlari qo‘zg‘atilgani buning yaqqol isboti.

Aziz Yurtdoshlar!

Tumanimizda 2026-yil davomida aholi gavjum joylar va ko‘chalarga, ko‘p qavatli uylar hovlilariga, mahallalarning asosiy kirish - chiqish joylariga, savdo markazlari va bozorlarga, ta’lim muassasalari kirish - chiqish joylariga kameralar o‘rnatish ishlari keng miqyosda olib borildi.

Ushbu amalga oshirilgan ishlar kirminogen vaziyatni nazorat qilish, sodir etilgan jinoyatlar bo‘yicha aybdor shaxslarni tezkorlik bilan topish hamda jinoyatga jazo muqarrarligini ta’minlashga salmoqli hissa qo‘shmoqda.

Bundan tashqari, sodir etilgan jinoyatlarni har kuni tezkor tahlil qilib, manzilli tadbirlarni belgilash, kunlik so‘rov va nazorat tizimi yo‘lga qo‘yildi.

Shuningdek, korrupsiyaga qarshi kurashish borasida barcha davlat tuzilmalari, keng jamoatchilik vakillari bilan hamkorlikni kuchaytirish borasida salmoqli ishlar olib borilib, har bir aniqlangan jinoyatlar bo‘yicha jazo muqarrarligi ta’minlanmoqda.

Qadrli tumanimiz ahli!

Jinoyat qurboni bo‘lib qolmaslik maqsadida, avvalo extiyotkorlikka rioya qilishimiz, turli aldovlarga ishonib qolmasligimiz lozim.

Notanish shaxslarning tekshirilmagan va ishonchsiz va’dalariga ishonib qolmang, shaxsiy hisoblaringiz haqida ma’lumotlarni berib qo‘ymang, mol-mulkingiz, binolaringiz, xonadonlaringizni qarovsiz qoldirmang, bu borada yaratilayotgan imkoniyatlardan foydalanishga e’tibor qarating.

Albatta, tumanimizda jinoyatchilikning oldini olishda eng avvalo, Siz jonkuyar va vatanparvar xalqimizga, Sizlarning amaliy yordam hamda hamkorligingizga tayanamiz.

Bu borada qonunga itoatkorlik xissini oshirishimiz, yaqinlarimizni ham shunga chorlashimiz asosiy ko‘maklardan biri bo‘lib hisoblanadi.

Agarda har bir fuqaro yurtimizni jinoyatdan holi, tinch va xavfsiz o‘lkaga aylantirishga o‘z hissasini qo‘shsa, shu yo‘lda muhtaram Prezidentimizga yelkadosh bo‘lib harakat qilsak, qonun ustuvor, adolat hukmron bo‘lgan jamiyatni barpo etamiz.

E’tiboringiz uchun rahmat!