O‘zbekiston madaniyat vazirning birinchi o'rinbosari Bahodir Ahmedovning nutqi
2024-11-19 12:00:00 / Rahbariyatning bayonotlari va nutqlari
ASSALOMU ALEYKUM HURMATLI DO'STLAR, AZIZ MEHMONLAR!
O‘zbek va turkman xalqlari azal-azaldan yaqin do‘st, ahil qo‘shni, strategik hamkor sifatida mushtarak maqsadlar bilan yashab kelmoqda. Shu sababli, ikki davlat o‘rtasidagi munosabatlarning ildizi uzoq tarixga borib taqaladi va o‘zaro hurmat, ishonch asosiga qurilgan.
Bugun O‘zbekistonning yaqin strategik hamkorlaridan biri – Turkmaniston bilan amalga oshirilayotgan va tobora yangi bosqichga ko‘tarilayotgan o‘zaro do‘stlik aloqalari haqida so‘z yuritish muhim ahamiyat kasb etadi.
Zero, ikki do‘st davlatlar o‘rtasidagi ijtimoiy, iqtisodiy, madaniy-ma’rifiy sohalardagi aloqalarni yangi bosqichga ko‘tarish, hamkorlikning yangi yo‘nalishlari va istiqbollarini belgilagan holda o‘zaro manfaatli hamkorlikni rivojlantirish borasida tarixiy ishlar amalga oshirildi.
Bir makonda mushtarak maqsadlar asosida yashab kelgan o‘zbek-turkman xalqlarining o‘zaro uyg‘unlikdagi etnografik madaniyatini targ‘ib etish maqsadida Urganch tumani G‘oybu qishlog‘i “Turkmanlar” mahallasi hududidagi “O‘zbek–Turkman do‘stlik uyi” va “Ulli hovli” majmuasida joylashgan bino va inshootlarni saqlash, kelajak avlodga etkazish bo‘yicha ko‘plab sa’y harakatlar amalga oshirilmoqda.
2018-yil 23-aprel kuni Toshkent shahrida Ashxobod sayilgohi ochildi, 2016-yil noyabrda hamda 2023-yil oktyabr oyida mamlakatimizda Turkmaniston madaniyati kunlari, o‘tkazildi.
Bugungi kunda mamlakatimizda turkmanlarning milliy madaniyati, tili, an’analari va urf-odatlarini asrash hamda rivojlantirish maqsadida Respublika turkman madaniy markazi faoliyati uchun barcha imkoniyatlar va shart-sharoitlar yaratilgan.
Turkmaniston bilan hamkorlik aloqalarini yanada mustahkamlash – O‘zbekiston tashqi siyosatining o‘zgarmas ustuvor yo‘nalishi bo‘lib qoladi.
Shunday ekan, Turkmaniston bilan madaniy va ilmiy sohalarda hamkorlikni rivojlantirib, ikki davlat o‘rtasidagi do‘stona aloqalarni yanada mustahkamlash yo‘lida barcha imkoniyatlarni ishga solamiz.
O‘z navbatida mazkur hamkorlik yoshlarimiz o‘rtasidagi madaniy almashinuvni kuchaytirib, an’anaviy qadriyatlarni saqlash va bir-birimizning madaniyatlarimizning rivojiga hissa qo‘shish imkonini beradi.
E’TIBORINGIZ UCHUN RAHMAT!