Bir guruh madaniyat va san’at sohasi vakillariga “Madaniyat va san’at fidokori” ko‘krak nishoni topshirildi
2024-09-11 10:00:00 / Yangiliklar
Xabaringiz bor, 26-30-avgust kunlari Samarqandda “Sharq taronalari” XIII xalqaro musiqa festivali hamda 31-avgust kuni yurtimiz mustaqilligining 33 yilligi munosabati bilan “Bir bo'lsak – yagona xalqmiz, birlashsak – vatanmiz!” shiori ostida bayramona konsert dasturi bo’lib o’tdi.
Ushbu tadbirlarning konsert dasturlarini tayyorlashda tashkiliy-ijodiy guruhning hamda guruhga rahbarlik qilgan madaniyat vaziri birinchi o‘rinbosari Bahodir Ahmedovning xizmatlari beqiyosdir.
Shu munosabat bilan, 10-sentyabr kuni mamlakatimizda madaniyat va san’at sohasini rivojlantirish, o‘zbek milliy madaniyati va san’ati nufuzini jahon miqyosida oshirishda fidokorona mehnat qilgan, shuningdek, o‘zining ko‘p yillik samarali mehnati bilan soha rivojiga munosib hissa qo‘shgan hamda yuqoridagi tadbirlarning yuqori saviyada o'tishida o'z xizmati, mehnati, fidokorligi bilan ishtirok etgan madaniyat va san’at sohasi vakillarining bir guruhi “Madaniyat va san’at fidokori” ko‘krak nishoni bilan taqdirlanadi.
“Madaniyat va san’at fidokori” ko‘krak nishonlari madaniyat vazirining birinchi o'rinbosari Bahodir Ahmedov tomonidan o'z egalariga topshirildi.
Madaniyat vazirligi jamoasi taqdirlanganlarni muborakbod etib, kelgusidagi ijodlariga muvaffaqiyat tilaydi.