“Milliy tiklanish” demokratik partiyasining IX Qurultoyida vazir nutq so'zladi
2024-09-06 11:00:00 / Rahbariyatning bayonotlari va nutqlari
Assalomu alaykum, hurmatli tadbir ishtirokchilari!
Qadrli partiyadoshlar!
Hurmatli Prezidentimiz Shavkat Miromonovich har bir chiqishlarida madaniyat, ma’naviyat haqida alohida to‘xtalib o‘tadilarki, bu bejiz emas, albatta.
Bugun inson madaniyatiga, qadriyatlariga turli tahdidlar kuchaygan murakkab davrda yashayapmiz.
Mana shunday sharoitda milliy an’analarimizni asrab-avaylash, yoshlarimizni fikri teran, dunyoqarashi keng, oqdan qorani yaxshi ajrata oladigan, shu tabarruk zamin taqdiriga mas’uliyat bilan qaraydigan barkamol insonlar etib tarbiyalash o‘ta dolzarb vazifaga aylanib bormoqda.
Va, barchamiz yaxshi anglaymizki, bunga erishishning yagona va to‘g‘ri yo‘li faqat va faqat ta’limda.
Davlatimiz rahbari mustaqilligimizning 33 yillik bayramiga bag‘ishlangan tantanali marosimdagi nutqlarida Yangi O‘zbekistonni barpo etishda e’tibor qaratilayotgan beshta asosiy ustuvor yo‘nalishni yana bir karra sanab o‘tdilar.
Ular orasida aynan sifatli ta’lim tizimini yo‘lga qo‘yish masalasi dastlabki muhim yo‘nalish sifatida alohida qayd etildi.
Darhaqiqat, har bir soha taraqqiyoti ilm bilan chambarchas bog‘liq.
Biz to‘g‘ri ta’lim-tarbiya berish orqali madaniy qarashlarni mustahkamlaymiz, uch ming yillik tariximizga tayanib, teran ildizlarimizdan quvvat olamiz, pirovardida milliy ruhni kuchaytiramiz.
Bularning barchasi yaxlit holda madaniyat ravnaqiga xizmat qiladi.
Binobarin, Hurmatli Prezidentimiz ta’kidlaganlaridek, “mamlakatimizda madaniyat va san’at taraqqiy etmasa, jamiyat rivojlanmaydi.
Xalqimizning rivojlanish darajasi avvalo milliy madaniyatimizga qarab baholanadi.
Shu ma’noda, madaniyat – bu xalqimiz, jamiyatimiz qiyofasidir. Biz O‘zbekistonning yangi qiyofasini yaratishga kirishgan ekanmiz, buni avvalo milliy madaniyatimizni rivojlantirishimizdan boshlashimiz lozim".
Mana shunday yondashuv, siyosat tufayli so‘nggi yillarda madaniyat va san’at sohasini qo‘llab-quvvatlashga juda katta e’tibor qaratilmoqda.
Bu partiyamizning ustuvor yo‘nalishiga ham to‘la-to‘kis hamohangdir.
Qolaversa, 2025 – 2029 yillarga mo‘ljallangan Saylovoldi dasturi loyihasida milliy madaniyat va ma’naviyatni rivojlantirish, qadriyatlarni saqlash, boyitish, madaniy meros muhofazasi, undan to‘g‘ri foydalanish, tashkiliy-huquqiy asoslarni mustahkamlash, davlat tili maqomini oshirish, mamlakatimiz va xorijda keng targ‘ib etish bo‘yicha ko‘plab takliflar va tashabbuslar ilgari surilganki, yaqin yillarda ularning amaliy ifodasini ta’minlash dolzarb ahamiyatga egadir.
Masalan, O‘zbek tiliga davlat tili maqomi berilganiga 35 yil bo‘ldi. Bu borada bir qator ishlar qilindi. Lekin, tan olish kerak, o‘zgarishlar qiyin kechayapti. Davlat tili masalasi nafaqat “Milliy tiklanish”, balki barcha uchun o‘ta muhim masala bo‘lmog‘i lozim.
Afsuski, ayni yo‘nalishda hokimliklar faoliyatida kamchiliklar ko‘zga tashlanyapti. Tashqi reklama va yozuvlar, e’lon va peshlavhalarni joylashtirishda davlat tiliga oid qonunchilik talablariga rioya qilinmayotgan holatlar uchramoqda.
Shundan kelib chiqib, dasturdagi Davlat tili maqomi va nufuzini oshirishga qaratilgan takliflarni to‘la qo‘llab-quvvatlayman.
Yana bir masala. Xalqimizning ko‘p asrlik madaniy meros ob’yektlarini asrab-avaylash haqida qancha gapirmaylik, ming afsuski, hamon ularga ziyon yetkazish holatlari uchramoqda.
Bir haqiqatni aslo unutmasligimiz kerak: zarar yetkazilgan tarixiy obidalarni hech qachon asl holida qayta tiklay olmaymiz. Buni kelajak avlod ham kechirmaydi.
Shularni e’tiborga olib, dasturda arxeologiya yodgorliklarini ochiq osmon ostidagi muzeyga aylantirish, madaniy meros ob’yektlari bilan tanishish va ularni ziyorat qilishdan boshqa maqsadlarda foydalanishni taqiqlashga qaratilgan qonun tashabbusi, madaniy meros ob’yektlarini ijaraga berish tizimini bekor qilish, madaniy, tabiiy va boshqa meros ob’yektlarini YUNESKO ro‘yxatlariga kiritish takliflarini ham qo‘llab-quvvatlayman.
E’tiboringiz uchun katta rahmat.