Madaniyat va san'at sohasida amalga oshirilayotgan islohotlar bo'yicha ochiq muloqot bo'lib o'tdi
2024-07-04 18:40:00 / Yangiliklar
Bugun, 4-iyul kuni Prezident Administratsiyasi Ijtimoiy rivojlanish departamenti rahbari Odil Abdurahmonov boshchiligida madaniyat va san'at sohasida amalga oshirilayotgan islohotlar bo'yicha ochiq muloqot bo'lib o'tdi.
Unda, madaniyat vazirining birinchi o'rinbosari Bahodir Ahmedov, O'zbekiston Respublikasi Ma'naviyat va ma'rifat markazi rahbari Otabek Hasanov hamda bir qator taniqli san'atkorlar, shoirlar, bastakorlar va madaniyat sohasi xodimlari, tizim tashkilotilari rahbarlari ishtirok etishdi.
Yig'ilish davomida Prezident tomonidan madaniyat va san'atni rivojlantirish hamda soha vakillarini qo'llab-quvvatlash borasida olib borilayotgan keng qamrovli ishlar va so'nggi yillarda qabul qilinayotgan qaror, farmonlar buning yaqqol misoli ekanligi ta'kidlandi.
Shuningdek, o'zbek madaniyat va san'atini jahonga tanitish borasida joriy yilning aprel oyida Xorazm viloyatida II Xalqaro Lazgi festivali, may oyida Buxoro viloyatida Xalqaro zardo'zlik va zargarlik festivali, Surxondaryo viloyatida “Boysun bahori” festivali, iyun oyida Jizzax viloyatida II Xalqaro maqom san'ati anjumani yuqori saviyada tashkil etilganligi hamda Prezidentning “Aholiga madaniy xizmat ko'rsatish darajasini yanada oshirish chora-tadbirlari to'g'risida”gi PQ-406-son qarori ijrosini ta'minlash maqsadida, yurtimizning olis hududlariga 86 ta gastrol safarlari uyushtirilganligi, 150 dan ortiq konsert dasturlari tashkil etilganligi, viloyatlarda 59 ta madaniyat kunlari tadbirlari o'tkazilganligi, 7 ta viloyatning 14 ta chekka hududlarida “Madaniyat karvoni” shaklidagi konsert-tomosha dasturlari tashkil etilganligi ta'kidlandi. Ushbu tadbirlarda 500 nafardan ortiq madaniyat xodimlari jalb etilib, 2 million 425 ming nafar aholi qamrab olinganligi ma’lum qilindi.
O'zbekiston Respublikasi mustaqilligining 33 yilligi munosabati bilan san'atkorlarga vatanparvarlik ruhidagi qo'shiqlar hamda kliplar suratga olish bo'yicha topshiriqlar berildi.