O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Ushbu islohotlarning huquqiy asosi sifatida joriy yilning 31-mart kuni Inspeksiya tomonidan 180/tk-sonli maxsus buyruq qabul qilindi. 2026-yilda yoshlarga oid davlat siyosatini amalga oshirishga qaratilgan ushbu hujjat bilan sohadagi yoshlar faoliyatini rivojlantirishning aniq dasturi tasdiqlandi.

Kadrlar salohiyatini oshirish va yoshlar bandligini ta’minlash maqsadida 2026-yil 27-mart kuni Geologiya fanlari universitetida yirik mehnat yarmarkasi tashkil etildi. Tadbirda bitiruvchi yoshlarga geologiya, tog‘-kon sanoati va energetika kabi mamlakat iqtisodiyoti uchun strategik ahamiyatga ega tarmoqlardagi bo‘sh ish o‘rinlari haqida batafsil ma’lumotlar berildi.

Soha xodimlarining intellektual salohiyatini yuksaltirish ham e’tibordan chetda qolgani yo‘q. 2026-yil 30-mart kuni Navoiy shahridagi “So‘g‘diyona” jismoniy tarbiya va sport majmuasida kon-metallurgiya sohasi vakillari o‘rtasida “Zakovat” intellektual turniri bo‘lib o‘tdi. Unda Inspeksiyaning yosh xodimlari munosib ishtirok etib, faxrli 4-o‘rinni qo‘lga kiritishdi.

Inspeksiya hayotida haftaning har payshanba kuni “Yoshlar kuni” sifatida belgilangani muhim o‘zgarishlardan biri bo‘ldi. Shu munosabat bilan bugun Inspeksiya Markaziy apparatida faoliyat yuritayotgan yosh xodimlar Inspeksiya boshlig‘i Jasur Adilov bilan uchrashishdi. Ushbu ochiq muloqot yoshlarning fikr va takliflarini bevosita rahbariyatga yetkazish imkonini berdi.

Bundan tashqari, xodimlarning bilim darajasini doimiy oshirib borish maqsadida Inspeksiyada maxsus yoshlar kutubxonasini tashkil etish rejalashtirilgan. Hozirda Yoshlar dasturi doirasida belgilangan boshqa tadbirlar ham tizimli ravishda davom ettirilmoqda.

Amalga oshirilayotgan ushbu chora-tadbirlar davlat nazorat organi tarkibida yangi avlod professional kadrlar qatlamini shakllantirishga xizmat qiladi. Yoshlarning bilim va ko‘nikmalarini bevosita amaliyot bilan bog‘lash, ularning ijtimoiy-siyosiy faolligini oshirish sohada qonuniylikni ta’minlashda muhim omil bo‘ladi.

Nazorat tizimining bunday modernizatsiya qilinishi kelajakda tog‘-kon va geologiya sohasida xavfsizlik va shaffoflik darajasini yanada oshiradi. Yosh kadrlarga qaratilgan e’tibor korrupsiyaviy xavflarni kamaytirish va iqtisodiy samaradorlikni oshirishda strategik ahamiyatga ega.