Navoiy viloyati Konimex tumani hokimligi

YIL BOʻYI QILINGAN MEHNATINGIZNI QADRLANG,
PAXTADAN YUQORI HOSILDORLIKKA ERISHING!
Hurmatli fermer xoʻjaligi rahbarlari!

Bugun oʻta ma'suliyatli pallaga kirdik. Paxta dalalarimizda yil davomida uyushqoqlik bilan olib borilgan agrotexnik tadbirlar natijasida katta paxta xirmoni uchun yetarli hosil yaratildi.
Uni qisqa muddatlarda sifatli va toʻliq yigʻib olish uchun barcha imkoniyatlarni safarbar etishga chaqiramiz.
Paxta terimi mavsumi davrida fermer xoʻjaliklariga yaratilgan imkoniyat va imtiyozlardan keng foydalanib Qishloq xoʻjaligi vazirligi va Oʻzbekiston fermerlari kengashining tavsiyalarini inobatga olib, ishlarni toʻgʻri va oqilona tashkil etish muhim.
Bu borada tuman fermerlari kengashlari tajribali ustoz fermerlar bilan birgalikda oʻzining beminnat yordamini ayamaydi.
Shu kunlarda ayrim joylarda kuzatilayotgan hali toʻliq yetilmagan, vazn toʻplash jarayonidagi paxtani terib olish holatlariga umuman yoʻl qoʻyib boʻlmasligini yana bir bor eslatishni lozim deb hisoblaymiz. Shoshqaloqlik bilan terimni erta boshlash yillik mehnat samarasiga salbiy ta'sir qiladi.
Gʻoʻzada yashil barglar va yetilayotgan koʻsaklar mavjud boʻlsa, dala hali terimga toʻliq tayyor emas. Shu bois defoliasiya va desikasiya tadbirlarini agrotexnik talablar asosida, oʻz vaqtida va sifatli oʻtkazish, hosilning toʻliq yetilishi uchun zarur sharoitni yaratish muhim. Paxta dalangizda toʻgʻri agrotexnologiyaga rioya qilinsa, gektaridan qoʻshimcha 10–20 sentnergacha paxta olish imkoniyati mavjudligini mutaxassislar ta'kidlashmoqda.Shunda gektaridan moʻljallangan 50-60 sentner oʻrniga 70-80 sentner hosil olishga puxta zamin yaratasiz.

Aziz fermerlar!

Shu bilan birga, defoliasiya va desikasiyadan keyin dalalarni «paxtaning vazni oshadi» degan maqsadda sugʻorish notoʻgʻri yondashuv hisoblanadi. Bu gʻoʻzaning qayta koʻkarishiga, yangi barglar chiqarishiga va hosilning yetilish jarayoni kechikishiga olib kelishi mumkin. Terimga tayyorlangan dalalarda agrotexnik talablarga qat'iy rioya qilish zarur boʻladi.
Har bir fermer va klaster uchun bu jarayondagi asosiy vazifa — dalaning holatini toʻgʻri baholash, hosil toʻliq yetilmasdan terimga shoshilmaslik va mavjud imkoniyatdan samarali foydalanishdir. Har bir gektar, har bir koʻsak va har bir sentner hosil — yil davomidagi mehnatning natijasidir. Moʻl hosil faqat uni yetishtirish bilan emas, balki uni oʻz vaqtida va sifatli yigʻib olish bilan ham yaratiladi. Yillik mehnat samarasini shoshqaloqlikka boy bermaylik — har bir daladan yuqori hosil olish uchun agrotexnik talablarga toʻliq amal qilaylik.

Mirishkor va fidoiy fermerlar!

Quyidagi tadbirlarga rioya qilgan holda ishlarni amalga oshiring! 
Birinchidan, dalangizni yana bir bor koʻzdan kechirib, paxta dalalarini toʻliq pishirib, terimga puxta tayyorlaning;
Ikkinchidan, defoliasiya va desikasiya qilinmagan maydonlaringizni sifatli tashkil eting;
Uchinchidan, Desikasiyadan keyin dalalarni asossiz sugʻormaslik; 
Toʻrtinchidan, hosil toʻliq yetilib, zarur agrotexnik tadbirlar yakunlanmasdan terimni boshlamang;
Beshinchidan, gʻoʻzapoya hali toʻliq qurimagan va oʻsimlikda yashil barglar mavjud boʻlgan dalalarga terimga tushishga yoʻl qoʻymang hamda dalangiz terimga tayyorligiga ishonch hosil qilganingizda terimga tushung;  
Oltinchidan, terimga tayyor dalangizni aslo sugʻormang;
Yetinchidan, paxta terish mashinalari bilan terishda dalalarni shay holatga keltiring, zarur tayyorgarlikni koʻring;
Sakkizinchidan, paxta yigʻim terimiga mehnat qonunchiligi va mehnat muhofazasi talablariga rioya etgan holda tashkil etishingizni hamda har qanday shakldagi majburiy mehnatdan foydalanmang.

Qadrli fermerlar!

Paxta xomashyosini qabul qilish jarayonida noxolis munosabat boʻlganda asossiz chegirmalar qoʻllanilganda Kengash mutaxassislari manfaatdor vazirlik va idoralar bilan birgalikda Sizning murojaatingizni koʻrib chiqib ishonchli tarzda himoya qiladi.
Barchangizni mavsumni yuqori uyushqoqlik bilan tashkil etib yil davomida qilingan mashaqqatli mehnatingizni qadrlab, paxtaningizni toʻliq pishirgandan keyin terib olishga chaqiramiz.
Bu orqali Siz oʻz xarajatlaringizni qoplab, yuqori daromad olishga erishing.
Xirmoningizga baraka tilaymiz, aziz fermerlar.

Tuman fermerlari kengashi