Navoiyda tuman va shahar hokimliklarining ochiqlik darajasini baholash amaliyotini joriy etish masalasida seminar tashkil etildi
2026-08-03 10:05:00 / Yangiliklar
Navoiy viloyati hokimligida tuman va shahar hokimliklarining ochiqlikka oid qonunchilik hujjatlari ijrosiga mas’ul xodimlari uchun o‘quv-seminar tashkil etildi.
Tadbir O‘zbekiston Respublikasi Prezidentining 2022 yil 14 iyundagi PF–154-son Farmoni hamda Korrupsiyaga qarshi kurashish milliy kengashining tegishli topshiriqlari ijrosini ta’minlash maqsadida o‘tkazildi. Seminarda Navoiy viloyati tuman va shahar hokimliklarida Ochiqlik indeksi baholash amaliyotini bosqichma-bosqich joriy etish masalalari muhokama qilindi.
Shuningdek, seminar davomida Korrupsiyaga qarshi kurashish agentligi, Iqtisodiyot va moliya vazirligi hamda “O‘zkomnazorat” inspeksiyasi mutaxassislari tomonidan Ochiqlik indeksi metodologiyasi, baholash indikatorlari va mezonlarining mazmun-mohiyati yuzasidan tushuntirishlar berildi.
Bundan tashqari, davlat organlarining rasmiy veb-saytlarida axborotlarni joylashtirish, ijtimoiy ahamiyatga molik ma’lumotlarni e’lon qilish, budjet jarayonining ochiqligini ta’minlash, elektron davlat xizmatlari ko‘rsatish, korrupsiyaning oldini olishda ochiqlik tamoyillarini qo‘llash hamda jamoatchilik kengashlari faoliyati samaradorligini baholash masalalari yuzasidan amaliy muhokamalar o‘tkazildi.