Navoiy viloyati Konimex tumani hokimligi

Poytaxtimizda boshlangan Toshkent xalqaro investitsiya forumida Navoiy viloyati delegatsiyasi keng tarkibda, tizimli yondashuv bilan qatnashmoqda.

E’tiborlisi, viloyat hokimi Normat Tursunov boshchiligidagi sa’y-harakatlarda tuman va shaharlar hokimlari ham yelkama-yelka turib, faollik ko‘rsatishapti. Ayni daqiqalarda hudud rahbarlari to‘g‘ridan-to‘g‘ri xorijlik investorlar, xalqaro kompaniyalar va biznes vakillari bilan yuzma-uz muzokaralar olib bormoqda.

Har bir tuman va shaharning o‘ziga xos imkoniyatlari va drayver sohalaridan kelib chiqib, «hududbay” tizimi asosida xorijiy sarmoyalarni to‘g‘ridan-to‘g‘ri mahalliy loyihalarga yo‘naltirish, chekka hududlarda ham yangi ishlab chiqarish quvvatlari va sanoat korxonalarini tashkil etish, aholi uchun yuqori daromadli yangi ish o‘rinlarini yaratish masalalari ko‘rilmoqda.

Bu galgi forumda Navoiy viloyatining har bir go‘shasi uchun alohida investitsiyaviy paketlar taklif etilmoqda. Bu esa yaqin kelajakda shahar va tumanlarimiz qiyofasini tubdan o‘zgartirishga xizmat qiladi.