Kasbiy ta’lim tizimida pedagog kadrlarning kasbiy mahoratini oshirish, ularning nazariy bilimlarini ilg‘or ishlab chiqarish tajribasi bilan uyg‘unlashtirish maqsadida texnikumlarning “Oshpaz” kasbi bo‘yicha pedagoglari uchun Hilton Tashkent City mehmonxonasi bazasida amaliy stajirovka tashkil etildi.

Stajirovka davomida pedagoglar mehmonxonaning ishlab chiqarish jarayonlari bilan yaqindan tanishib, 6 ta yo‘nalishlarda bevosita amaliy mashg‘ulotlarda ishtirok etdi:

Issiq taomlar tayyorlash;

Sovuq taomlar tayyorlash;

Qandolatchilik mahsulotlarini tayyorlash;

Non va non mahsulotlari ishlab chiqarish;

Go‘sht va baliqqa dastlabki ishlov berish;

Sabzavotlarga dastlabki ishlov berish.

Amaliy stajirovka jarayonida pedagoglar mehmonxonaning tajribali mutaxassislari bilan birgalikda taom tayyorlash bosqichlarini bajardilar, zamonaviy oshpazlik texnologiyalari va professional oshxona jihozlaridan foydalanish ko‘nikmalarini egalladilar. Shuningdek, xalqaro mehmondo‘stlik sohasida qo‘llaniladigan xizmat ko‘rsatish standartlari, sanitariya-gigiyena talablari hamda ishlab chiqarish jarayonlarini samarali tashkil etish amaliyoti bilan tanishdilar.

Hamkorlikni yanada kengaytirish maqsadida Hilton Tashkent City mehmonxonasi ma’muriyati bilan “Turizm va mehmondo‘stlik” yo‘nalishida faoliyat yuritayotgan texnikumlarning boshqa pedagoglarini ham bosqichma-bosqich amaliy stajirovkalarga jalb etish bo‘yicha kelishuvga erishildi.

Stajirovka yakunida ishtirokchilarga Kasbiy ta’lim agentligi hamda Hilton Tashkent City mehmonxonasi tomonidan tegishli sertifikatlar topshirildi.

Mazkur hamkorlik kasbiy ta’lim pedagoglarining amaliy kompetensiyalarini rivojlantirish, ta’lim jarayoniga zamonaviy ishlab chiqarish tajribasini olib kirish hamda texnikumlarda mehnat bozori talablariga mos malakali mutaxassislar tayyorlash sifatini oshirishga xizmat qiladi.