Kasbiy taʼlim agentligi

Toshkent viloyati hokimi va Rejeb Geduk boshchiligidagi turkiyalik investorlar o‘rtasidagi uchrashuvda Bo‘stonliq turizm va madaniy meros texnikumi huzurida xalqaro turizm kasbiy tayyorgarlik markazini tashkil etish taklifi ko‘rib chiqildi.

Shuningdek, kadrlarning kasbiy malakasini oshirish, ularga xorijiy tillarni o‘rgatish va belgilangan talablar asosida ayrim mutaxassislarni Turkiyada malaka oshirishga yuborish masalalari muhokama qilindi.

Loyiha doirasida mehmonxona xizmatlarining turli yo‘nalishlari, jumladan, mehmonlarni qabul qilish, xonalarni bronlash, xonalarga xizmat ko‘rsatish, oshpazlik hamda restoran xizmati bo‘yicha mutaxassislar tayyorlash ko‘zda tutilgan. O‘quv jarayonida nazariy bilimlar bilan bir qatorda mehmonxonalar, restoranlar va dam olish majmualarida amaliy mashg‘ulotlarni tashkil etish ham rejalashtirilmoqda.

Mazkur tashabbus texnikumda kasbiy ta’lim imkoniyatlarini kengaytirish, mehnat bozori talablariga mos mutaxassislar tayyorlash hamda turizm sohasida ta’lim va amaliyot integratsiyasini kuchaytirishga xizmat qiladi.