Furqat tumani texnikumida “Har bir daraxtga — bir mas’ul o‘quvchi” tashabbusi yo‘lga qo‘yildi
2026-10-28 18:00:00 / Yangiliklar
Farg‘ona viloyatidagi Furqat tumani texnikumida “Yashil makon” umummilliy loyihasi doirasida hududdagi mevali va manzarali daraxtlarga mas’ul o‘quvchilar biriktirildi. Tashabbus yoshlarning ekologik madaniyatini yuksaltirish hamda ularni yashil hududlarni asrab-avaylashga faol jalb etishga qaratilgan.
Shu munosabat bilan o‘tkazilgan tadbirda texnikum hududini obodonlashtirish va daraxtlarni parvarishlash borasidagi ishlar bilan tanishildi. Har bir daraxtga mas’ul o‘quvchining ism-familiyasi ko‘rsatilgan maxsus yorliq o‘rnatildi.
Endilikda o‘quvchilar o‘zlariga biriktirilgan daraxtlarni muntazam parvarishlab boradi. Bu amaliyot yoshlarda tabiatga mehr va shaxsiy mas’uliyat hissini mustahkamlash, atrof-muhitni asrashni kundalik odatga aylantirishga xizmat qiladi.