Hurmatli hamkasblar, aziz yurtdoshlar!

Har yili 21-oktabr sanasini — O‘zbek tiliga davlat tili maqomi berilgan kunga bag‘ishlab, biz o‘z yuragimizdan faxr va iftixor bilan nishonlaymiz. Bu sana — milliy o‘zligimizning, tarixiy xotiramizning, ruhiy qudratimizning eng yorqin timsollaridan biridir.

Davlat tilimiz — o‘zbek tili asrlar davomida xalqimizning bebaho ma’naviy merosi, adabiyotimiz, san’atimiz va madaniyatimizning uzviy tayanchidir. O‘zbek tili orqali biz o‘z tariximizni, qadriyatlarimizni, buyuk ajdodlarimizning dono so‘zlarini va ularning merosini asraymiz. Til — bu nafaqat muloqot vositasi, balki millatning yuragi, xalqning birligini, g‘ururini va ezgu orzularini ifoda etuvchi kuchdir.

Bugungi kunda O‘zbekistonimiz taraqqiyot yo‘lida yangi bosqichni bosib o‘tayotgan bir paytda, o‘zbek tilining nufuzi va mavqei yuksalib borayotgani hammamizni quvontiradi. Raqamli texnologiyalar, moliya va iqtisod sohalarida ham davlat tilimizning qo‘llanishi kengayib, yangi avlod mutaxassislarining nutq madaniyatida, hujjat yuritishda va xalq bilan muloqotda o‘zbek tilining o‘rni tobora mustahkamlanmoqda.

Hurmatli hamkasblar!

Sizlarni, butun O‘zbekiston xalqini O‘zbek tili bayrami bilan chin dildan tabriklayman! Ona tilimizni e’zozlash, uni asrab-avaylash va yanada boyitish — barchamizning muqaddas burchimizdir. Har bir so‘zda mehr, har bir jumlada g‘urur, har bir ishda Vatanga muhabbat mujassam bo‘lsin.

Tilimiz doimo ravnaq topib, xalqimizning birlik va farovonligiga xizmat qilsin!

Bayram muborak, aziz yurtdoshlar!

Hurmat bilan, Abdulaziz Xaydarov.

O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasi raisi