Toshkent shahrida Jahon banki bilan hamkorlikda o‘tayotgan “G‘aznachilik faoliyatini modernizatsiya qilish va raqamlashtirish” mavzusidagi G‘aznachilik amaliyoti hamjamiyati (TCOP) yalpi yig‘ilishining uchinchi kuni 15-oktabrda o‘z ishini davom ettirdi.

Tadbirda 20 dan ortiq mamlakatlarning g‘aznachilik tizimi mutaxassislari, xalqaro tashkilotlar vakillari hamda O‘zbekiston Respublikasi Iqtisodiyot va moliya vazirligi vakillari ishtirok etmoqda.

Yig‘ilishning birinchi sessiyasi “PEMPAL mamlakatlarida raqamli texnologiyalar sohasidagi ilg‘or tendensiyalarga muvofiq biznes jarayonlarini avtomatlashtirish” mavzusiga bag‘ishlandi.

Serbiya G‘aznachiligi direktori o‘rinbosari vazifasini bajaruvchi Yelena Fishchan mamlakatda joriy etilgan raqamli imzolarni tekshirish va hujjatlar aylanishini boshqarish tizimi haqida ma’lumot berdi. U raqamli nazorat va avtomatlashtirilgan hujjat aylanishi orqali budjet mablag‘larini boshqarish jarayonlari soddalashgani va shaffoflik oshgani haqida so‘z yuritdi.

Ruminiya Moliya vazirligi davlat kotibi o‘rinbosari Attila Gyorgiy o‘z chiqishida mamlakat g‘aznachiligi orqali amalga oshiriladigan to‘lovlarda xatoliklarni kamaytirish bo‘yicha tajriba bilan o‘rtoqlashdi. Mazkur sessiyada Jahon bankining Janubiy Osiyo mintaqasi bo‘yicha davlat boshqaruvi katta mutaxassisi Xuram Faruk muhokamalarga diskussant sifatida ishtirok etdi.

Keyingi sessiyalar “Davlat korxonalarini g‘aznachilik tizimiga qamrab olish: mezonlar va yondashuvlar” mavzusida o‘tkazildi.

TCOP’ning tematik masalalar bo‘yicha maslahatchisi Mark Silins va tashkilotning Resurs guruhi a’zosi Yelena Dobrolyubova davlat korxonalarini yagona g‘aznachilik tizimiga (YG‘T) integratsiya qilishda xalqaro amaliyotlar, normativ yondashuvlar hamda shaffoflikni ta’minlash mexanizmlarini tahlil qildi.

Gruziya Davlat G‘aznachiligi Davlat qarzlari va depozit operatsiyalari departamenti boshlig‘i o‘rinbosari Irakliy Vachnadze mamlakat tajribasida davlat korxonalarini YG‘T doirasiga qo‘shish jarayonini taqdim etdi.

Vengriya Davlat g‘aznachiligi vitse-prezidenti maslahatchisi Andrash Rez esa Vengriyada YG‘T qamrovini kengaytirish bo‘yicha amalga oshirilgan so‘nggi islohotlar haqida ma’lumot berdi.

Sessiyalar yakunida ishtirokchilar kichik guruhlar shaklida muhokamalar olib bordilar. Guruh natijalari yig‘ilishda taqdim etilib, mamlakatlar o‘rtasida tajriba almashishning amaliy ahamiyati alohida qayd etildi.

Yig‘ilish yakunida TCOP Ijroiya qo‘mitasining alohida yig‘ilishi bo‘lib o‘tdi, unda hamjamiyat faoliyatining istiqboldagi yo‘nalishlari va hamkorlik tashabbuslari muhokama qilindi. Tadbirning uchinchi kuni davomida ilg‘or texnologiyalarni joriy etish, davlat korxonalarini g‘aznachilik tizimiga bosqichma-bosqich integratsiya qilish hamda xalqaro hamkorlikni kuchaytirish masalalariga alohida e’tibor qaratildi. Mazkur yo‘nalishlarda erishilayotgan tajribalar Davlat moliyasini boshqarish tizimini yanada raqamlashtirish va samaradorligini oshirishga xizmat qilishi kutilmoqda.