“Yangi O‘zbekiston yoshlari birlashaylik” shiori ostida navbatdagi yoshlar tadbiri o‘tkazildi
2025-07-25 00:00:00 / Yangiliklar
2025-yil 25–26-iyul kunlari G‘aznachilik xizmati qo‘mitasida yoshlar bilan ishlashni yangi bosqichga olib chiqish, ularning faolligini oshirish va munosib rag‘batlantirish maqsadida “Yangi O‘zbekiston yoshlari birlashaylik” shiori ostida navbatdagi yirik tadbir tashkil etildi.
Tadbirda G‘aznachilik xizmati qo‘mitasi markaziy apparati hamda barcha hududiy bo‘linmalardan faol yosh xodimlar ishtirok etdi.
Tadbir doirasida yoshlar uchun amaliy trening tashkil etildi. Treningni “Oriental” universitetining yoshlar masalalari, ma’naviy va ma’rifiy ishlar bo‘yicha birinchi prorektor maslahatchisi Nuriddin Ubaydullayev olib bordi va ishtirokchilar bilan jamoada samarali ishlash ko‘nikmalari va shaxsiy rivojlanish bo‘yicha qimmatli bilim va tajribalari bilan bo‘lishdi.
Shu bilan birga, sport sog‘lom hayot mezoni ekanligini inobatga olib, yoshlar o‘rtasida stol tennisi, badminton va shaxmat bo‘yicha sport musobaqalari ham tashkil etildi.
Shuningdek, tadbir ishtirokchilari dam olish va madaniy saviyalarini oshirish maqsadida Kinochilar uyida o‘zbek milliy kinosi — “Bahodir Yalangto‘sh” filmini tomosha qilishdi.
26-iyul kuni esa G‘aznachilik xizmati qo‘mitasi raisi Xaydarov Abdulaziz Abdulaxadovich G‘aznachilik xizmati qo‘mitasi boshqarma boshliqlari bilan birgalikda yoshlar bilan ochiq muloqot o‘tkazdi. Uchrashuvda tizimda faoliyat olib borayotgan yosh xodimlarning fikrlari tinglandi, takliflari muhokama qilindi va faol ishtirok etgan yoshlarni taqdirlash marosimi o‘tkazildi.
Qo‘mita raisi o‘z nutqida yoshlarga bo‘lgan katta ishonchni ta’kidladi va ularning g‘aznachilik tizimini yanada rivojlantirishdagi muhim o‘rnini alohida e’tirof etdi.
Mazkur tadbir yoshlar uchun nafaqat rag‘batlantiruvchi, balki bilim va tajriba almashish, sog‘lom raqobat va do‘stona muhitda yangi tashabbuslarni ilgari surishga xizmat qiluvchi muhim platforma bo‘ldi.