O'zbekiston Respublikasi Iqtisodiyot vа Moliya vazirligi huzuridagi G'aznachilik xizmati qo'mitasi

Yuz jafo qilsa manga, bir qatla faryod aylamon,

Elga qilsa bir jafo, yuz qatla faryod aylaram.

Joriy yilning 19-fevral kuni G‘aznachilik xizmati qo‘mitasida betakror ijodi bilan adabiyot olamiga munosib hissa qoʻshgan ulugʻ allomalar — Nizomiddin Mir Alisher Navoiy hamda Zahiriddin Muhammad Bobur hayoti va ijodiga bagʻishlangan maʼnaviy-maʼrifiy tadbir o‘tkazildi.

Unda vazirlikning Maʼnaviyat va ma’rifat kengashi a’zolari, Ijro apparati rahbariyati, Faxriylar kengashi hamda Xotin-qizlar va yoshlar boshlang‘ich tashkiloti yetakchilari ishtirok etdi. Shuningdek, g‘aznachilik xizmati qo‘mitasining hududiy boshqarmalari xodimlari onlayn tarzda qatnashdi.

Ushbu tadbirda Iqtisodiyot va moliya vaziri maslahatchisi, O‘zbekiston Yozuvchilar uyushmasi a’zosi Obiddin Maxmudov Alisher Navoiy asarlarida odamiylik konsepsiyasi mazmun-mohiyati va umumbashariy ezgulik g‘oyalarining Yangi O‘zbekiston – ma’rifatli jamiyatni barpo etishdagi beqiyos ahamiyati haqida to‘xtaldi.

Shuningdek, Navoiy merosi asrlar osha butun bashariyatni hayratga solib, insonlar ong-u shuuriga ezgulik, insonparvarlik, saxovat, mehr-muruvvat ziyosini taratib kelayotgani ayni haqiqat ekani, bugun ushbu ma’naviy xazinaning ahamiyati har qachongidan ham yuksalgani, hazrat asarlarida tarannum etilgan oliyjanob g‘oyalarni, jamiyat, xususan, mahalla va oilaga tatbiq etish lozimligi alohida ta’kidlandi.

Beqaydmen-u xarobi siym ermasmen,

 Ham mol yig‘ishtirur laim ermasmen.

Kobulda iqomat qildi Bobur, dersiz,

Andoq demangizlarki, muqim ermasmen.

Respublika “Ma’rifat” targʻibotchilar jamiyati a’zosi, jurnalist Oygul Kajanova Zahiriddin Muhammad Boburning qomusiy alloma, maʼrifatli hukmdor va shoir, mohir sarkarda sifatidagi fazilatlariga alohida toʻxtalib oʻtdi. Ayniqsa, uning ulug‘ vatandoshimizning oʻzbek milliy artilleriyasi asoschisi sifatida toʻp yaratgani xususidagi maʼlumoti tinglovchilarda qiziqish uygʻotdi. Shuningdek, Mirzo Bobur islohotlarida inson qadri, uning shaʼni oliy darajada ekanligini isbotlovchi, oqilona siyosati tufayli  aholining oʻz hukmdoriga nisbatan ehtiromi yuksak boʻlganligini tarixiy misollar orqali batafsil soʻzladi.

Vazirlik yoshlar yetakchisi Dilshod Jumanazarov esa “Alisher Navoiy” spektaklidan ibratli bir parchani mahorat bilan ijro etdi.

Maʼruzalar davra suhbatiga ulanib, xodimlar ikki ulug‘ siymo she’rlardan bahr-u bayt oʻtkazishdi. Faol ishtirok etgan xodimlarga turli mavzuga oid ma’naviy-ma’rifiy kitoblar ulashildi.

Shuningdek, tadbir so‘ngida vazirlik rahbariyati tomonidan Gʻaznachilik xizmati qo‘mitasi markaziy apparati kutubxonasiga ijtimoiy-siyosiy, adabiy-badiiy asarlar to‘plami taqdim etildi.