Amir Temur tavalludi munosabati bilan ma’naviy-ma’rifiy tadbir tashkil etildi
2026-04-09 00:00:00 / Yangiliklar
2026-yil 9-aprel kuni Iqtisodiyot va moliya vazirligi huzuridagi G‘aznachilik xizmati qo‘mitasida ish kuni buyuk sarkarda va davlat arbobi Amir Temur tavalludiga bag‘ishlangan ma’naviy-ma’rifiy tadbir bilan boshlandi.
Tadbir davomida xodimlar tomonidan Amir Temurning hayoti, uning yuksak davlat boshqaruvi, strategik tafakkuri va harbiy san’atdagi buyuk mahoratini yoritib beruvchi sahna ko‘rinishlari namoyish etildi. Ushbu chiqishlar orqali Sohibqironning jasorati, qat’iyati hamda adolatga asoslangan boshqaruv tamoyillari keng targ‘ib qilindi.
Shuningdek, tadbir doirasida Amir Temur hayoti va faoliyatiga oid boy kitoblar ko‘rgazmasi tashkil etildi. Unda Sohibqironning davlatni mustahkamlash, savdo va iqtisodiyotni rivojlantirish, ilm-fan va bunyodkorlikni qo‘llab-quvvatlash borasidagi tarixiy xizmatlari haqida batafsil ma’lumotlar taqdim etildi.
Ma’lumki, Amir Temur o‘z davrida markazlashgan qudratli davlat barpo etib, mamlakatda tinchlik va barqarorlikni ta’minlashga erishgan, uning tashabbusi bilan ayniqsa Samarqand yirik ilmiy va madaniy markazga aylangan.
Tadbir jarayonida xodimlar ishtirokida Amir Temur hayoti va faoliyatiga oid qiziqarli savol-javoblar ham o‘tkazildi hamda savollarga to‘g‘ri javob bergan xodimlarga “Temur tuzuklari” kitobi sovg‘a qilindi.
Mazkur tadbir xodimlarda milliy tariximizga hurmat, buyuk ajdodlarimiz merosiga sadoqat va yurt taraqqiyotiga daxldorlik hissini yanada mustahkamlashga xizmat qildi.