Qo‘shni mamlakatlar bilan chegara hududlardagi ko‘chib yuruvchi yovvoyi hayvonlar sanoqdan o‘tkazilmoqda
2024-09-16 11:50:00 / Yangiliklar
Ta’kidlash joizki, Oʻzbekiston Respublikasi Prezidentining “Oʻzbekiston Respublikasida ekologik turizmni jadal rivojlantirish chora-tadbirlari toʻgʻrisida” 2024-yil 12-yanvardagi 21-son Qarori ijrosini taʼminlash maqsadida Oʻzbekiston Respublikasi Fanlar akademiyasi bilan hamkorlikda ishlar olib borildi. Qo‘shni respublikalar bilan chegara hududlar orqali koʻchib yuruvchi 17 turdagi yovvoyi hayvon turlari, jumladan, qor qoploni, saygʻoq, turkman quloni, Buxoro bugʻusi, jayron kabi Oʻzbekiston Respublikasi Qizil kitobi va Xalqaro qizil kitobga kiritilgan noyob hayvonlarning roʻyxati shakllantirilib, hisobi yuritilmoqda.
Shuningdek, chegaradosh hududlarda joylashgan METHlardagi koʻchib yuruvchi 17 tur boʻyicha 3 000 bosh yovvoyi hayvonlar soni hisobga olindi. Ushbu yovvoyi hayvon turlari boʻyicha doimiy monitoring yoʻlga qoʻyilgan. Qolgan chegaradosh hududlardagi koʻchib yuruvchi hayvon turlarini hisobga olish boʻyicha tegishli vazirlik idoralar bilan hamkorlikda ishlar olib borilmoqda.
Hayvonlarning koʻchib yuruvchi turlari sayyoramiz ekotizimlarining ajralmas qismi hisoblanadi. Hozirgi kunda iqlim oʻzgarishi, yashash joylarining yaroqsiz holga kelishi, noqonuniy ov va savdo kabi jiddiy tahdidlarning koʻpayib borayotgani natijasida bu turdagi hayvonlarning genetik resurslari qisqarib, ularning nodir va noyob turlari, tabiiy uygʻunlik va ekotizimlar yoʻqolib borayotgani kuzatilmoqda.
Bioxilma-xillikni, shu jumladan, koʻchib yuruvchi yovvoyi hayvonlarni saqlab qolish borasidagi ushbu amaliy saʼy-harakatlar qoʻshni davlatlar bilan hamkorlikda samarali chora-tadbirlarni amalga oshirishga xizmat qiladi.