Ijtimoiy tarmoqlarda Baliqchi tumanidagi davlat tashkilotlarida kadrlar masalasi, jumladan, yosh mutaxassislarni ish bilan ta’minlash, pensiya yoshidagi xodimlarning mehnat faoliyati hamda ayrim rahbarlarning vakolatlariga oid fikr va murojaatlar yuzasidan quyidagilarni ma’lum qilamiz.

Avvalo, tuman hokimligi tomonidan aholi, ayniqsa, bilim va salohiyatga ega yoshlarni ish bilan ta’minlash, ularning davlat va boshqa tashkilotlarda o‘z kasbiy faoliyatini boshlashi uchun imkoniyat yaratish masalalariga alohida e’tibor qaratib kelinmoqda.

Shu bilan birga, pensiya yoshiga yetgan xodimlarning mehnat faoliyatini davom ettirayotgani o‘z-o‘zidan qonunbuzarlik yoki ularning lavozimini bo‘shatish uchun asos hisoblanmaydi. Mehnat munosabatlari amaldagi qonunchilik, belgilangan tartib va xodimning kasbiy faoliyatiga qo‘yiladigan talablar asosida tartibga solinadi. Shu sababli muayyan xodimlarni faqat yoshiga qarab lavozimidan ozod etish yoki ularning o‘rniga boshqa shaxslarni tayinlash qonuniy jihatdan to‘g‘ri emas.

Murojaatda tilga olingan Baliqchi tumani maktabgacha va maktab ta’limi bo‘limi boshlig‘i Nazokatxon Hakimova hamda tuman tibbiyot tizimida faoliyat yuritayotgan mas’ul xodimlarga oid bildirilgan fikrlar yuzasidan ham tegishli hujjatlar va vakolatli tashkilotlarning xulosalarisiz biror shaxsning faoliyati yoki sha’ni va qadr-qimmatiga daxldor xulosalar chiqarish mumkin emas.

Tuman hokimligi davlat tashkilotlaridagi kadrlar faoliyatini qonunchilikda belgilangan vakolatlar doirasida o‘rganish va mavjud muammolarni aniqlashga tayyor. Bunda xodimning yoshi, tanish-bilishligi yoki boshqa subyektiv mezonlar emas, balki uning malakasi, kasbiy faoliyati, egallab turgan lavozimiga muvofiqligi va mehnat intizomiga rioya qilishi asosiy mezon hisoblanadi.

Shuningdek, davlat tashkilotlarida faoliyat yuritayotgan xodimlarning bir-biri haqida asossiz murojaatlar yoki tasdiqlanmagan ma’lumotlarni tarqatishi maqbul emas. Har qanday murojaat va e’tirozlar belgilangan tartibda, aniq fakt va hujjatlarga asoslangan holda ko‘rib chiqilishi lozim.

Tuman hokimligi yosh va malakali mutaxassislarni qo‘llab-quvvatlash, ularning bandligini ta’minlash hamda davlat tashkilotlarida sog‘lom mehnat muhitini shakllantirish masalalariga bundan buyon ham alohida e’tibor qaratadi.

Murojaatda ko‘tarilgan masalalar yuzasidan tegishli tashkilotlar faoliyati va kadrlar bilan bog‘liq holatlar qonunchilikda belgilangan vakolatlar doirasida o‘rganib chiqiladi. Aniqlangan holatlarga huquqiy baho beriladi va zarur choralar ko‘riladi.

Baliqchi tuman hokimligining asosiy maqsadi — kadrlar masalasida adolat, qonuniylik va shaffoflikni ta’minlash, yosh mutaxassislar uchun munosib imkoniyatlar yaratish hamda davlat tashkilotlarida samarali va professional faoliyatni yo‘lga qo‘yishdir.