Andijon viloyati Baliqchi tumani hokimligi

"Assalomu alaykum, hurmatli tumanimiz fuqarolari hamda shahrimizga tashrif buyurgan aziz mehmonlar!

Barchamizga ma'lumki, so'nggi yillarda dunyo bo'yicha havo harorati keskin o'zgarib, global isish bilan bog'liq iqlim o'zgarishi jarayonlari respublikamiz iqlimiga ham sezilarli ta'sir ko'rsatmoqda.Ushbu vaqtlarda iste'molchilarning sovutish jihozlaridan foydalanish ehtiyojining keskin oshishi oqibatida, elektr ta'minotida yuzaga kelishi mumkin bo'lgan ortiqcha yuklanishlar, shuningdek, aholi yashash punktlari va yirik sanoat korxonalari hududlarining qurigan o'simliklardan tozalanmasligi yong'inlar sonining keskin oshishiga olib kelmoqda.

Joriy yil yoz mavsumida sodir bo'lishi mumkin bo'lgan yong'inlarning oldini olish, ushbu yo'nalishlarda mavjud muammolarni bartaraf etish, yong'in xavfsizligini ta'minlashning qo'shimcha talablarini belgilash orqali profilaktika tadbirlarining samaradorligini yanada oshirish maqsadida, joriy yil 5-iyuldan 5-sentyabrga qadar respublikada"Yoz mavsumida yong'inlarning oldini olishga qaratilgan dolzarb 60 kun" tadbiri o'tkazilishi rejalashtirilgan.

"Dolzarb 60 kun" tadbiri davomida viloyat hamda shahar-tumanlarda tuzilgan ishchi guruhlar tomonidan quyidagilarga alohida e'tibor qaratish va amalga oshirish belgilandi:

Uy-joy fondida elektr energiyasi, tabiiy va suyultirilgan gazdan to'g'ri foydalanish qoidalari va boshqa yong'in xavfsizligi talablariga rioya etilishini o'rganish, mavjud qoidabuzarlik va kamchiliklarni bartaraf etish choralarini ko'rish.

Ta'lim tashkilotlari, sog'liqni saqlash muassasalari va boshqa ijtimoiy soha hamda iqtisodiyot obyektlarida yong'in xavfsizligini ta'minlash bo'yicha profilaktik ko'riklar o'tkazish.

Energiya ta'minoti obyektlarida xavfsizlik texnikasi, sanoat va yong'in xavfsizligi qoidalariga rioya etilishini o'rganish va mavjud kamchiliklarni bartaraf etish choralarini ko'rish.

Bozorlar va savdo komplekslarida hamda odamlar ommaviy ko'p yig'iladigan boshqa joylarda yong'in xavfsizligi talablariga rioya etilishini ta'minlash.

Yozgi dam olish va sog'lomlashtirish mavsumida oromgohlar, sanatoriyalar hamda boshqa dam olish va sog'lomlashtirish maskanlarida favqulodda vaziyatlarning oldini olish va yong'in xavfsizligini ta'minlashga qaratilgan kuchaytirilgan profilaktika tadbirlarini amalga oshirish.

O'rmon xo'jaliklari hududida yong'in xavfsizligini ta'minlash.

2026-2027-o'quv yilida ta'lim muassasalariga o'qishga qabul qilish bo'yicha test sinovlari o'tkaziladigan obyektlarning yong'inga qarshi holatini talab darajasiga keltirish asosiy yo'nalishlar etib belgilangan.

Yuqoridagi tadbirlarni sifatli va o'z vaqtida tashkil etish orqali xalqimizning yillar davomida misqollab yig'gan mol-mulklarini yong'in va boshqa baxtsiz hodisalardan muhofaza qilish, eng asosiysi — fuqarolarning yong'in oqibatida halok bo'lishining oldini olishga xizmat qilishligi barchaning e'tiboriga yetkazish orqali quyidagilarga doimo amal qilishlarini so'rab, tavsiya etib qolamiz:

1. Ochiq olovni nazoratsiz qoldirmaslikni;

2. Tamaki qoldiqlarini quruq o't va chiqindilar ustiga tashlamaslikni;

3. Elektr jihozlarining sozligini muntazam tekshirib borish, nosozlaridan foydalanmaslikni;

4. Bitta rozetkaga bir nechta kuchli elektr jihozini ulamaslikni;

5. Hovli va uylar atrofini quruq o't hamda yonuvchan chiqindilardan doimiy tozalab borishni;

6. Bolalarni gugurt va boshqa uchqun chiquvchi moslamalar bilan o'ynashiga yo'l qo'ymaslikni;

7. Iloji boricha soat 10:00 dan 17:00 gacha tik tushadigan quyosh nurlari ostida bo'lmaslikni;

8. Yong'in yoki boshqa hodisalar yuz berganda, darhol 112 qisqa raqamiga qo'ng'iroq qilishingizni so'rab qolamiz."