Turkiyaning zargarlik sohasidagi tajribasini oʻrganish, tarmoqni yanada rivojlantirish hamda bunga dastak boʻluvchi qonunchilik parametrlariga kiritilishi lozim boʻlgan oʻzgartirishlar boʻyicha takliflar tayyorlash maqsadida Oliy Majlis Qonunchilik palatasi deputatlari, Iqtisodiyot va moliya vazirligi, Bojxona qoʻmitasi, Davlat asillik darajasi nazorati inspeksiyasi, Savdo-sanoat palatasi hamda "Oʻzbekzargarsanoati" uyushmasi masʼullaridan iborat ishchi guruh vakillari Turkiyaning Istanbul shahrida oʻz faoliyatlarini boshladilar.

Dastlabki kun ishchi guruh aʼzolari Istanbul zargarlar palatasi raisi Mustafa Atayik bilan uchrashuvda ishtirok etib, Palataning ish faoliyati, asillik darajasini aniqlash laboratoriyalari bilan tanishdilar. Ikki mamlakatning zargarlik yoʻnalishidagi bugungi kundagi holati taqqoslandi, qilinishi lozim boʻlgan ishlar batafsil muhokama qilindi.