Davlat asillik darajasi nazorati inspeksiyasida Mustaqillikning 35 yilligiga bag‘ishlangan tadbir bo‘lib o‘tdi
2026-08-27 11:55:00 / Majlislar
Davlat asillik darajasi nazorati inspeksiyasida Vatanimiz mustaqilligining qutlug‘ 35 yillik bayrami munosabati bilan ma’naviy-ma’rifiy tadbir tashkil etildi. Unda inspeksiya rahbariyati, soha xodimlari hamda san’at namoyandalari ishtirok etishdi.
Tadbirni inspeksiya rahbari Boboyev Raximjon Maxamadjomovish kirish so‘zi bilan ochib berdi. U o‘z nutqida mustaqillik yillarida mamlakatimiz iqtisodiyoti, xususan, zargarlik sanoati va asillik darajasini nazorat qilish tizimida amalga oshirilgan keng ko‘lamli islohotlar, sohaga joriy etilgan zamonaviy qulayliklar hamda erishilgan yutuqlarga alohida to‘xtalib o‘tdi. Shuningdek, barcha xodimlarni ushbu ulug‘ ayyom bilan qutlab, kelgusi faoliyatlarida muvaffaqiyatlar tiladi.
Tadbirning maxsus mehmoni — O‘zbekiston xalq artisti Gavhar Zokirova ham so‘zga chiqib, yig‘ilganlarni bayram bilan muborakbod etdi. Taniqli ijodkor mustaqillik bergan imkoniyatlar, yurtimizdagi tinchlik va osoyishtalik ne’mati haqida samimiy fikrlarini bildirib, barchaga ko‘tarinki kayfiyat ulashdi.
Shuningdek, Gavhar Zokirova istiqlol bergan ne’matlarni asrab-avaylash har bir fuqaroning burchi ekanligini ta’kidlab, tadbir ishtirokchilarini va butun inspeksiya jamoasini Mustaqillikning 35 yillik bayrami bilan muborakbod etdi. Samimiy va ko‘tarinki ruhda o‘tgan uchrashuv yig‘ilganlarda katta taassurot qoldirdi.