Davlat asillik darajasi nazorati inspeksiyasida xotin-qizlarning ijtimoiy-siyosiy faolligini oshirishga bag‘ishlangan seminar bo‘lib o‘tdi
2026-08-24 10:55:00 / Majlislar
O‘zbekiston Respublikasi Iqtisodiyot va moliya vazirligi huzuridagi Davlat asillik darajasi nazorati inspeksiyasida Vatanimiz mustaqilligining 35 yillik shonli sanasi arafasida tizimda xizmat qilayotgan xotin-qizlarning huquqiy va kasbiy bilimlarini yuksaltirishga bag‘ishlangan seminar-trening tashkil etildi.
Ma’lumki, mamlakatimizda amalga oshirilayotgan islohotlar jarayonida ayollarning jamiyat va davlat boshqaruvidagi rolini oshirish, ularning gender tengligini ta’minlash hamda huquq va manfaatlarini himoya qilish masalalariga davlat darajasida alohida e’tibor qaratib kelinmoqda.
Tadbir davomida Inspeksiyaning xotin-qizlar faollari so‘zga chiqib, bugungi kunda ayol rahbarlar va xodimlarning boshqaruv salohiyatini kuchaytirish, ularning zamonaviy liderlik xislatlarini shakllantirish hamda kasbiy va oilaviy hayot uyg‘unligini ta’minlash borasida amalga oshirilayotgan ishlar yuzasidan atroflicha tushuntirish va ma’ruzalar berdilar. Shuningdek, xodimalarning ish jarayonida o‘z iqtidor va salohiyatini to‘laqonli namoyon etishlari uchun yaratilgan shart-sharoitlar tahlil qilindi.
Ushbu tashkil etilgan seminar-trening inspeksiya tizimida faoliyat yuritayotgan tashabbuskor, bilimli ayollarning o‘zaro tajriba almashishlariga, ularning kelgusi faoliyatida samarali ish muhitini yaratish hamda rahbarlik qobiliyatlarini yanada shakllantirishga xizmat qilishi ta’kidlandi. Tadbir yakunida ishtirokchilar o‘zlarini qiziqtirgan savollarga batafsil javob oldilar.