“INNOWOMENWEEK-2024” Toshkentda: Ayollarning IT sohasidagi o‘rni mavzusida tadbir bo‘lib o‘tdi
2024-10-14 12:20:00 / Yangiliklar
Tadbirda O‘zbekiston Respublikasi Bosh vazirining o‘rinbosari Zulayho Mahkamova, Raqamli texnologiyalar vaziri o‘rinbosari Rustam Karimjonov va vazir maslahatchisi Kamola Sobirova ishtirok etdi. Shuningdek, Koreya ixtirochi ayollar assotsiatsiyasi delegatsiyasi va IT sohasiga qiziquvchi xotin-qizlar ham tadbirga tashrif buyurdi.
Tadbirning asosiy maqsadi — xotin-qizlarni IT sohasiga jalb qilish, innovatsiya, texnologiya, tadbirkorlik va ilm-fan sohalarida ishtirokini oshirish va rag‘batlantirishdan iborat.
Tadbir davomida IT sohasida muvaffaqiyatga erishgan xotin-qizlar o‘z tajribalari bilan o‘rtoqlashdi va taqdimot o‘tkazdi.
Bundan tashqari, Koreya ixtirochi ayollar assotsiatsiyasi delegatsiyasi bilan uchrashuv tashkil etildi. Uchrashuv davomida ayollarni qo‘llab-quvvatlash, ta’lim olish imkoniyatlarini kengaytirish va gender tenglikni ta’minlash masalalariga alohida e’tibor qaratildi.
Tomonlar xotin-qizlarning IT sohasidagi ishtirokini oshirish va bu yo‘nalishda tajriba hamda bilim almashish orqali hamkorlikni kuchaytirishga kelishib oldilar. Raqamli rivojlanishda ayollarni faol jalb qilish va ularni qo‘llab-quvvatlashga qaratilgan loyihalarni birgalikda amalga oshirish rejalari belgilandi.
Ushbu uchrashuv ikki mamlakat o‘rtasidagi do‘stlik aloqalarini yanada mustahkamlab, innovatsiyalar va yangi imkoniyatlarni yaratishga turtki bo‘ladi.