Farg‘ona va Quvayt aloqalari kengaymoqda

Dastlabki kunda Quvaytda viloyatda qator yirik investitsion loyihalarni amalga oshirishni rejalashtirayotgan “Gulf Care General Trade” hamda “Energy Solutions” kompaniyalari boshqaruv kengashi raisi Eyad al-Saleh bilan muzokaralar o‘tkazildi.  

Uchrashuvda ikki hudud o‘rtasida qator sohalarda mustahkamlanib borayotgan hamkorlik aloqalari xususida muloqot qilinib, amalga oshirilishi ko‘zda tutilayotgan yangi loyihalar bo‘yicha fikr almashildi.  

Quvaytlik yirik tadbirkor Eyad al-Saleh neft va gaz, energetika, tibbiyot, farmatsevtika, qurilish, ipakchilik, tog‘-kon sanoati, metallurgiya yo‘nalishlarida dunyoning turli davlatlaridagi 20 ga yaqin kompaniya sohibi sanaladi.  

Eyad al-Saleh viloyatga ikki bor tashrif buyurgan bo‘lib, ushbu tashriflar davomida quvaytlik tadbirkor Farg‘ona viloyatida davlat tibbiyot muassasasi uchun diagnostika-laboratoriyasini tashkil etish va jihozlash loyihasini amalga oshirish bo‘yicha dastlabki kelishuvlar olib borgan. Ushbu mamlakatga tashrifning maqsadi ham yangi loyiha bo‘yicha yakuniy bitimlarni imzolashdan iborat.  

Muloqotda ikki hudud o‘rtasida yangi aloqalar davri boshlanayotganligi, ushbu bitim orqali Quvayt kompaniyasining O‘zbekistondagi faoliyati boshlanishiga start berilganligi mamnuniyat bilan qayd etildi.  

Boshlanayotgan yangi loyiha kelajakdagi ishlarning debochasi bo‘lishi, Quvayt kompaniyasi tomonidan Farg‘onada amalga oshiriladigan kelgusidagi barcha loyihalar ham qo‘llab-quvvatlanishi, ushbu hamkorlik ikki hudud uchun ham manfaatli bo‘lishligi ta’kidlandi.  

Farg‘ona viloyatida davlat tibbiyot muassasalariga xizmat ko‘rsatuvchi diagnostik laboratoriyalarni tashkil etish, boshqarish va sinov xizmatlari bo‘yicha xalqaro hamkorlik kelishuvi imzolandi.  

Quvaytdagi elchixonada “Marafie Group” kompaniyalar guruhi boshqaruvi vakillari bilan uchrashuv ham tashkil etildi.  

Quvaytning eng yirik biznes tuzilmalaridan biri hisoblanadigan, 1919-yilda tashkil etilgan “Marafie Group” kompaniyalar guruhi “Forbes” jurnalining “Top 100 arab oilaviy biznesi” ro‘yxatiga kiritilgan. Asosan savdo, qurilish, ishlab chiqarish va dizayn sohalarida ish olib boradi. 30 ta kompaniyani o‘z ichiga olgan “Marafie Group“ 300 dan ortiq brendga ega hisoblanadi.  

O‘zbekistonda amalga oshirilayotgan islohotlarni yuksak baholagan “Marafie Group” vakillari Farg‘ona viloyatida qishloq xo‘jaligi sohasidagi, shuningdek, sanoatning qator yo‘nalishlaridagi investitsion loyihalarni amalga oshirishda ishtirok etishga tayyorligini bildirdi.

Farg‘ona viloyatining investitsion, savdo-iqtisodiy salohiyati, qishloq xo‘jaligi sohasidagi imkoniyatlari, investorlarga yaratilgan sharoitlar borasida batafsil ma’lumot berildi. Meva-sabzavotlarni chuqur qayta ishlash va yangi eksport bozorlariga kirib borish masalasi bugungi kunda ustuvor yo‘nalish ekanligi qayd etilib, bu boradagi loyihalar har tomonlama qo‘llab-quvvatlanishi ma’lum qilindi.

Muzokara davomida erishilgan dastlabki kelishuvlar bo‘yicha hamkorlikda ish tashkil etishga kelishib olindi.  

Viloyat hokimi Xayrullo Bozorov Quvaytdagi tashrifi davomida “Kuwait Airways” aviakompaniyasi bosh ofisida bo‘lib, Quvaytning ushbu milliy aviakompaniyasi boshqaruv kengashi raisi Abdulmohsen Salem Alfagaan va boshqaruv kengashi a’zolari bilan uchrashdi.  

Uchrashuvda “Kuwait Airways” tomonidan Quvaytdan Farg‘onaga to‘g‘ridan to‘g‘ri muntazam aviaqatnovlarni yo‘lga qo‘yish masalasi va kelgusidagi hamkorlik istiqbollari muhokama qilindi.  

Samimiy qabul uchun minnatdorlik bildirgan viloyat hokimi bu yil Quvayt bilan qator sohalarda yangi aloqalar yo‘lga qo‘yilayotganini qayd etib, ushbu aviakompaniya bilan ham hamkorlikda ishlash bo‘yicha kelishuvlarga tayyor ekanligini ma’lum qildi.

Farg‘ona viloyatining iqtisodiy-investitsion salohiyati, turli sohalardagi yutuqlari bo‘yicha atroflicha ma’lumot taqdim etildi. Farg‘ona xalqaro aeroporti parvozlar ko‘lami bo‘yicha respublikada o‘z o‘rniga egaligi, viloyatimiz xorijlik va mahalliy turistlarni jalb etish bo‘yicha, turistik infratuzilma imkoniyatlari bo‘yicha eng old  hududlardan biri ekani qayd etildi.  

Bugun O‘zbekistonda aholining aviaqatnovlarga bo‘lgan talabi ortib borayotgani bois, xorijiy aviakompaniyalar bilan ham birgalikda ishlash yo‘lga qo‘yilayotganligi ta’kidlandi. Farg‘onadan Quvaytga parvoz vaqti atigi 3-3,5 soatni tashkil qilishini hisobga olganda, Quvayt xalqaro aeroporti O‘zbekiston fuqarolari uchun qulay tranzit nuqtasiga aylanishi mumkinligiga e’tibor qaratildi. Shuningdek, Quvayt aholisi uchun O‘zbekistonda joriy etilgan 10 kunlik vizasiz rejimdan kelib chiqqan holda Farg‘onaga kelish istagini bildirayotgan quvaytliklar ham yetarli ekani urg‘ulandi.  

“Kuwait Airways” aviakompaniyasi boshqaruv kengashi raisi Abdulmohsen Salem Alfagaan Farg‘onaga muntazam qatnovlarni yo‘lga qo‘yish masalasiga katta qiziqish bildirishayotganini qayd etib, bu borada rejali ish tashkil etilishini bildirdi.  

“Kuwait Airways” rahbari O‘zbekiston va Quvayt o‘rtasida aviaqatnovlar bo‘yicha mavjud ikki tomonlama shartnoma bandlarini bugungi kundagi mavjud talab va hamkorlik darajasidan kelib chiqqan holda qayta ko‘rib chiqilishi ikki tomon uchun ham manfaatli bo‘lishini aytib o‘tdi.  

Muntazam aviaqatnovlarning yo‘lga qo‘yilishi, logistika nuqtayi nazaridan ham juda muhimligini ta’kidlab o‘tgan viloyat hokimi Farg‘onada ishlab chiqarilgan va yetishtirilgan mahsulotlarni Quvaytga va bu yerdan boshqa davlatlarga yetkazib berishda tijoriy qatnovlarning ham tashkil etilishi samarali bo‘lishini qayd etdi.  

Uchrashuvda bildirilgan takliflar asosida qo‘shma ishchi guruh tuzilib, amaliy chora-tadbirlar ishlab chiqishga va hamkorlikda ish tashkil qilishga kelishildi.