BMTning O‘zbekistondagi vakili bilan uchrashuv bo‘lib o‘tdi
2024-08-30 10:00:00 / Yangiliklar
Yoshlar ishlari agentligi binosida Agentlik direktori Alisher Sa’dullayev BMTning O‘zbekistondagi vakili Sabine Mahl bilan uchrashuv o‘tkazdi. Uchrashuv davomida O‘zbekistonning yoshlarga oid davlat siyosati va yoshlar sohasida amalga oshirilayotgan keng qamrovli islohotlar haqida atroflicha ma’lumot berildi. Xususan, ta’lim, kasb-hunarga o‘rgatish, tadbirkorlik, ekologiya, volontyorlik va yoshlarning bo‘sh vaqtini mazmunli tashkil etish kabi dolzarb yo‘nalishlar doirasida yaratilgan yangi tizimlar batafsil muhokama qilindi.
Yoshlar ishlari agentligi tomonidan amalga oshirilayotgan "Ibrat farzandlari", "Mutolaa", "Ustoz AI", "Vikistipeniya", "1000KITOB", va "UzChess" kabi loyihalar bilan tanishtirilib, ularning mamlakat yoshlarining intellektual va ma’naviy rivojlanishiga qo‘shayotgan hissasi e’tirof etildi.
Uchrashuv davomida O‘zbekiston va BMT o‘rtasida yoshlarga oid sohada mustahkam hamkorlik yo‘lga qo‘yilganligi qayd etildi. Shuningdek, O‘zbekistonning “Yoshlar strategiyasi - 2030” doirasida amalga oshirayotgan ishlari BMT tomonidan yuqori baholanib, bu strategiya xalqaro miqyosda 10 ta namunaviy mamlakat qatoridan joy olgani alohida ta’kidlandi.
Uchrashuv yakunida ikki tomonlama hamkorlikni yanada chuqurlashtirish, yoshlar siyosati sohasida yangi tashabbuslar va loyihalarni birgalikda amalga oshirish borasida kelishuvga erishildi. Bu kabi hamkorliklar yoshlar uchun yangi imkoniyatlar yaratishga xizmat qiladi.