СУВДАН НОҚОНУНИЙ ФОЙДАЛАНАЁТГАНЛАРГА ТЕГИШЛИ ЧОРАЛАР КЎРИЛДИ.
2025-09-25 14:30:00 / Янгиликлар
2025 йилнинг ўтган даврида Инспекциясининг Навоий вилояти бошқармаси томонидан ўтказилган назорат тадбирларида 455 та ҳолатда ноқонуний сув олиш жойлари аниқланган.
Биргина мисол, ўтказилган назорат тадбирлари жараёнида Навбаҳор туманидан оқиб ўтувчи Кармана-Конимех ирригация тизим бошқармаси тасарруфидаги “Конимех” каналида сув ва сувдан фойдаланиш бўйича ноқонуний ҳолатлар аниқланди.
Унда “Конимех” каналида истеъмолчилар томонидан канал қирғоғининг икки жойидан насос агрегатини ўрнатиш ва бешта жойидан ноқонуний қувурлар ўтказиб олганлик ҳолатлари аниқланиб, ўзбошимчалик билан сувдан фойдаланаётган жисмоний ва юридик шахсларга нисбатан ваколат доирасида белгиланган тартибда чоралар кўрилиб жарима жазоси тайинланиб ноқонуний ўзбошимчалик билан уланиб олинган қувурлар каналдан олиб ташланди – дейди “Сувхўжаликназорат” инспекцияси Навоий вилояти бошқармаси бўлим бошлиғи Шоҳрух Турсунов.
Шу билан бирга, биринчи марта сувдан ўзбошимчалик билан фойдаланган жисмоний ва юридик шахсларга ушбу ҳолатлар такрор содир этилса, айибдорларга нисбатан қонунда белгиланган тартибда чоралар кўрилиши тўғрисида огоҳлантиришлар берилди.
Бундан ташқари, бошқарма бошлиғи сувдан фойдаланиш ва сув истеъмоли тартибига риоя этилиши устидан назоратни таъминлаш бўйича мутахассисларга юклатилган назорат функцияларини бажаришда ҳамда аниқланган тартиббузарлик ҳолатлари бўйича таъсир чораларини қўллаш юзасидан тушунтириш ишлари олиб борди.
Шунингдек, таъсир чоралар қўллаш билан тартиббузарликларга тўлиқ барҳам бериб бўлмаслиги, сувнинг қадри ҳақида тарғибот тадбирларини кучайтириш зарурлиги таъкидлади.
Жойларда рейд тадбирлари давом этмоқда.