КОРРУПЦИЯ – ЭНГ ЖИДДИЙ ТАҲДИД!
2026-02-10 12:00:00 / Раҳбариятнинг баёнотлари ва нутқлари
Коррупцияга йўл қўйиш эса – ислоҳотларимизга хиёнатдир!
Шавкат МИРЗИЁЕВ
Ўзбекистон Республикаси Президенти
Мамлакатимизда кoррупцияга қарши курашиш сиёсати қатъий ва тизимли амалга оширилмоқда.
Ўзбекистон Республикаси Президентининг соҳадаги ислоҳотларини қўллаб-қувватлаш, “Сувхўжаликназорат” инспекцияси тизимида коррупцияни таг-томири билан йўқ қилиш мақсадида тизимни рақамлаштиришга алоҳида эътибор қаратилмоқда.
Жумладан, бугунги кунда инспекциянинг 36 та функциясидан 18 тасини ёки 50 фоизини ўз ичига қамраб олган “suvnazorat.uz” электрон платформаси ишга туширилиб, асосий фаолият турлари рақамлаштирилишига эришилди.
Зеро, Давлатимиз раҳбари “Рақамлаштиришдан бош тортаётган раҳбар – коррупцияни йўқ қилишга интилмаган раҳбар” деб таъкидлаганлар.
Шунингдек, Президентимизнинг мурожаатномасида бу масалага ҳам алоҳида эътибор қаратилди.
Жумладан, коррупция – давлат тараққиётига тўсиқ бўладиган, адолат ва қонун устуворлигини издан чиқарадиган, жамиятда ишонч муҳитини заифлаштирадиган энг жиддий таҳдид эканлиги таъкидланди.
Ўзбекистон Республикаси Президентининг 2025 йил 30 декабрдаги “Ўзбекистон Республикасида коррупциянинг олдини олиш ва унга қарши курашиш тизимини янада такомиллаштириш тўғрисида” ПФ-270-сон Фармони қабул қилинди.
Фармон билан коррупциянинг олдини олиш ва унга қарши курашиш соҳасидаги давлат сиёсатини сифат жиҳатидан янги босқичга кўтаришнинг 2030 йилгача бўлган устувор йўналишлари белгиланди.
Жорий йилнинг 3 февраль куни Инспекция ва унинг ҳудудий бошқармаларидаги барча ходимлар иштирокида семинар тадбири ўтказилди.
Семинарда Давлатимиз раҳбари томонидан соҳада амалга оширилаётган ислоҳотлар ҳамда Фармоннинг мазмун-моҳиятини тушунтириш ва Инспекция фаолиятида келгусида амалга оширилиши лозим бўлган долзарб масалаларга тўхталиб ўтилди.
Мурожаатномада таъкидланган ҳамда Фармонда белгиланган масалалар ижросини Инспекция органлари томонидан бажарилишини таъминлаш мақсадида манзилли “чора-тадбирлар” режаси тасдиқланди ҳамда унинг ижроси қатъий назоратга олинди.
Жорий йилда инспекциянинг қолган барча функцияларини рақамлаштириш олдимизга қўйган энг муҳим масалалардан биридир.
Шунингдек, коррупцияга қарши курашишда ходимларнинг билим ва кўникмаларини ошириш ва бошқа шу каби превентив чораларга эътибор қаратилади.
Инспекцияда қонунийлик, очиқлик ва шаффофлик, тизимлилик тамойилларига асосланган ҳолда коррупциянинг олдини олиш ва унга қарши курашиш соҳасидаги давлат сиёсатини изчил давом эттириш, мамлакатимизнинг халқаро рейтинг ва индекслардаги позициясини янада яхшилашга қаратилган барча зарур чоралар кўриб борилиши таъминланади.
Ҳурматли ҳамкасблар!
Шу билан биргаликда, Инспекция тизимида фаолият юритаётган барча ходимлардан коррупциявий ҳаракатлар учун жавобгарликнинг муқаррарлиги тамойилига таянган ҳолда коррупция билан боғлиқ ҳуқуқбузарликларни содир этмаслигингиз, бошқа шахсларнинг манфаатларини кўзлаб ҳаракат қилмаслигингиз, пора олиш ёки ғайриқонуний бошқа мақсадларда ўз хизмат мавқеингиздан ноқонуний фойдаланмаслигингиз талаб қилинади.
Сизларни коррупция ҳолатларининг ҳар қандай кўринишларига нисбатан муросасиз муносабатда бўлишга ҳамда ўз хизмат вазифаларингизни ҳалол ва виждонан бажаришингизга яна бир бор чақираман.
Ҳурматли фуқаролар!
Инспекция фаолиятига оид коррупциявий ҳамда манфаатлар тўқнашуви билан боғлиқ ҳар қандай мурожаатларни қуйида келтирилган махсус алоқа каналлари орқали юборишингиз мумкин, сизнинг шахсингиз сир сақланиши ҳамда тасдиқланган ҳар бир коррупциявий ҳолат учун ходимларга кескин қонуний чоралар кўрилиши таъминланади.
ишонч телефони: +99855-520-71-66;
расмий веб-сайт: gov.uz/oz/vnadzor;
электрон почта манзили: anticorruption@v-nadzor.gov.uz.
Рахимов Рустам Ботирович,
“Сувхўжаликназорат”
инспекцияси бошлиғи