РАСМИЙ МУНОСАБАТ
2026-11-02 23:30:00 / Янгиликлар
Ижтимоий тармоқларда Транспорт назорати инспекцияси Фарғона вилояти ҳудудий бўлими инспектори томонидан юк ҳужжатларини текшириш жараёнида юзага келган ҳолат юзасидан тарқалган хабарлар бўйича қуйидагиларни маълум қиламиз.
Жумладан, инспектор томонидан ўтказилган назорат тадбири давомида юк автомобили ҳайдовчисидан товар-транспорт юк хати талаб қилинган. Ҳайдовчи томонидан мазкур ҳужжат қоғоз шаклида тақдим этилган.
Шундан сўнг инспектор амалдаги қонунчилик талабларига мувофиқ, товар-транспорт юк хатлари электрон шаклда расмийлаштирилиши лозимлигини ҳайдовчига тушунтирган. Тегишли тушунтиришлар берилгач, ҳайдовчи ҳаракатини давом эттирган.
Маълумот учун, Ўзбекистон Республикаси Вазирлар Маҳкамасининг 2020 йил 20-октабрдаги «Солиқ маъмуриятчилигида замонавий ахборот-коммуникация технологияларини қўллашнинг қўшимча чора-тадбирлари тўғрисида»ги 673-сон қарорига мувофиқ, товар-транспорт юк хатларини электрон шаклда расмийлаштириш белгиланган.
Шу билан бирга, товар-транспорт юк хатини электрон шаклда расмийлаштириш жараёнида техник носозликлар юзага келган тақдирда, ушбу ҳужжатни қоғоз шаклида расмийлаштиришга йўл қўйилади. Бунда техник носозликлар электрон товар-транспорт юк хатлари тизими оператори томонидан расман тасдиқланган бўлиши шарт.
Шунингдек, ахборот тизимидаги техник носозликлар бартараф этилганидан сўнг беш календарь кун ичида қоғоз шаклида расмийлаштирилган товар-транспорт юк хатида кўрсатилган сана билан электрон шаклда ахборот тизимига киритилиши лозим.
Юқоридагилардан келиб чиқиб, товар-транспорт юк хатларини расмийлаштиришда амалдаги қонунчилик талабларига риоя этиш, шунингдек, уларни қоғоз шаклида расмийлаштириш учун белгиланган истисно ҳолатлар ва тартибларга амал қилиш зарурлигини эслатиб ўтамиз.
Транспорт назорати инспекцияси
Ахборот хизмати