Транспорт соҳасида қонунчиликка риоя этиш ва хавфсизлик масалалари муҳокама қилинди
2026-06-09 15:29:00 / Янгиликлар
Транспорт назорати инспекцияси марказий аппарати ва ҳудудий бўлимлари ходимлари ҳамда ДХХ ходимлари иштирокида очиқ давра суҳбати ташкил этилди.
Дастлаб, Инспекциянинг Коррупцияга қарши курашиш бўлими бошлиғи Ў.Очилов томонидан тизимда коррупциянинг олдини олиш ва унга қарши курашиш борасида амалга оширилган ишлар юзасидан батафсил ахборот берилди. Жумладан, коррупсиявий хавф-хатарларни аниқлаш ва камайтириш, ходимлар ўртасида ҳалоллик ва очиқлик тамойилларини мустаҳкамлаш, манфаатлар тўқнашувининг олдини олиш ҳамда коррупцияга қарши курашиш бўйича олиб борилаётган профилактик тадбирлар ҳақида маълумотлар тақдим этилди.
Тадбир давомида транспорт соҳасида қонунчилик талабларига риоя этиш, хизмат фаолиятида масъулият ва интизомни кучайтириш, коррупциянинг олдини олиш ва ташишлар хавфсизлигини таъминлаш масалалари юзасидан атрофлича фикр алмашилди.
Семинарда мутахассислар томонидан амалдаги қонунчиликдаги талаблар, хизмат фаолиятида учраши мумкин бўлган хавф ва таҳдидларнинг олдини олиш, ходимларнинг ҳуқуқий маданияти ҳамда касбий малакасини ошириш бўйича тавсиялар берилди.
Бундай семинарлар ходимларнинг билим ва кўникмаларини мустаҳкамлаш, транспорт соҳасида қонун устуворлигини таъминлаш ҳамда тизим фаолияти самарадорлигини янада оширишга хизмат қилиши таъкидланди.