Мактабгача ва мактаб таълими вазири Эъзоза Каримова Финландиянинг Ўзбекистондаги янги тайинланган фавқулодда ва мухтор элчиси Ёханна Мария Огрен билан учрашди.

Учрашув аввалида вазир Эъзоза Каримова Ёханна Мария Огренни Финландиянинг Ўзбекистондаги Фавқулодда ва Мухтор элчиси лавозимига қайта тайинлангани муносабати билан самимий табриклаб, янги дипломатик фаолиятида улкан муваффақият тилади.

Мулоқот давомида икки мамлакат ўртасидаги таълим соҳасидаги ҳамкорлик, жумладан "Finnish Inspired Edusation System Development in Uzbekistan (FIESDU)" лойиҳаси доирасидаги натижалар, ўқитувчиларнинг касбий ривожланиши, рақамли таълим ечимларини жорий этиш ҳамда келгусидаги ҳамкорлик истиқболлари муҳокама қилинди.

Маълумот учун: FIESDU лойиҳаси доирасида ўқитувчиларнинг касбий ривожланиши, таълим сифатини баҳолаш, таълим бошқарувини такомиллаштириш ва инклюзив таълимни ривожлантириш йўналишларида Финляндиянинг илғор тажрибаси жорий этилмоқда.

Шунингдек, ЮНИСEФ кўмагида Ўзбекистонда «Eduten» рақамли таълим платформаси синовдан ўтказилиб, 200 нафар ўқитувчининг рақамли платформалардан фойдаланиш салоҳияти оширилди.

Учрашув якунида томонлар келгусидаги ҳамкорлик йўналишлари ҳақида сўз юритишди ва ўзаро алоқаларни янада мустаҳкамлашга келишиб олишди.