Инсон ҳаёти, шаъни ва қадр-қимматини улуғлаш, эзгулик ва адолат тамойилларига содиқ қолиш мақсадида 2024 йилда Ўзбекистон Республикаси Президентининг ташаббуси билан юртимизга бир гуруҳ фаластинлик меҳмонлар олиб келинди.

Уларнинг тақдирига бефарқ қолмасдан ҳар бир оиланинг муаммосини ўрганиш, уларни мамлакатимизда яшашга мослаштириш жараёнига кўмаклашиш бўйича тизимли ишлар йўлга қўйилди.

Хусусан, бугунги кунда Тошкент шаҳри ва Тошкент вилоятида фаластинлик 33 та оиланинг 32 нафар мактаб ёшидаги ҳамда 13 нафар мактабгача таълим ёшидаги болалари таълим ташкилотларида таҳсил олиб келишмоқда.

Шунингдек, уларнинг қизиқишларидан келиб чиққан ҳолда болалар фан, спорт, маданий ва тил йўналишларидаги 14 та тўгаракка жалб этилди.

Мазкур йўналишда амалга оширилаётган ишларнинг мантиқий давоми сифатида бугун Мактабгача ва мактаб таълими вазирига бириктирилган фаластинлик Мариам Алдаҳма ҳолидан хабар олинди.

Муборак Рамазон ойи муносабати билан ушбу хонадонда ифторлик ташкил қилиниб, улар билан суҳбат қурилди.

Қайд этиш лозимки, вазирлик томонидан Мариам Алдаҳма оиласи ҳолидан доимий тарзда хабар олиб, уларга зарур кўмак кўрсатилиб келинмоқда.

Хусусан, унинг фарзандлари хусусий таълим марказларида таҳсил олиш истагини билдиргани инобатга олиниб, уларга зарур шароитлар яратиб берилди.