Ўзбекистон Республикаси Президенти Администрацияси раҳбари ўринбосари Ҳилола Умарова, Мактабгача ва мактаб таълими вазири Эъзоза Каримова Термиз Иқтисодиёт ва сервис университетида бўлишди.

Бу ерда таълим жараёнлари, амалга оширилаётган ишлар ҳамда ўқув хоналари билан танишиб, талабалар билан мулоқот қилинди.

Шундан сўнг, университет фаолияти, истиқболдаги режалар ҳамда лойиҳалар ҳақида тақдимот бўлиб ўтди.

Учрашув якунида ушбу таълим муассасаси таъсисчиси ва раҳбари Жамшидбек Пардаев таълим соҳасидаги фаолияти учун "Халқ таълими ҳомийси" кўкрак нишони билан тақдирланди.

Маълумот ўрнида: тадбиркор Олтинсой туманидаги ўзи таҳсил олган 48-мактабни тўлиқ таъмирлаб берган. Айни дамда у бошчилик қилаётган Термиз Иқтисодиёт ва сервис университетида 30 минг нафардан ортиқ талаба таҳсил олмоқда.

Шу куни Ҳилола Умарова Сурхондарё илғор касбий маҳорат техникуми ва Термиз давлат университетида ҳам бўлди ва бу ерда амалга оширилаётган ишлар билан танишди.

Масъуллар билан мулоқот давомида мазкур таълим масканида талабаларнинг сифатли таълим олишлари учун зарур шароитларни яратиш бўйича ўз тавсияларини берди.