Ўзбекистон Республикаси Миллий инвестиция жамғармаси томонидан “Инвестор куни” тадбири ташкил этилди

Тадбир мамлакат иқтисодиётининг устувор тармоқларидаги инвестиция имкониятларини намойиш этиш учун муҳим платформа бўлди ҳамда 67 дан ортиқ маҳаллий ва халқаро инвестиция компаниялари, фондлар, банклар ва молия институтлари вакилларидан иборат 200 дан зиёд иштирокчини бирлаштирди. Ушбу компаниялар биргаликда 1 триллион АҚШ долларидан ортиқ активларни бошқаради.

Тадбирда Шимолий Америка, Европа, Яқин Шарқ ва Осиёнинг йирик молиявий марказларидан ташриф буюрган иштирокчилар қатнашди, бу эса халқаро инвесторларнинг Ўзбекистонга бўлган ортиб бораётган ишончи ва қизиқишини намоён этди.

Инвестор куни дастури UzNIF портфелидаги етакчи компанияларга ташрифлар, макроиқтисодий ривожланиш, энергетика ва молия соҳаси бўйича панель муҳокамалар, шунингдек инвесторлар билан индивидуал ва гуруҳ учрашувларини ўз ичига олди.

Тадбирнинг асосий сессиясида Ўзбекистон Республикаси Бош вазири ўринбосари – Иқтисодиёт ва молия вазири Жамшид Қўчқоров ҳамда Ўзбекистон Республикаси Марказий банки раиси Тимур Ишметов маъруза билан чиқиш қилди.

Franklin Templeton Global Investments компаниясининг бош инвестиция директори Манраж Секхон ўз чиқишида Franklin Templeton учун Ўзбекистоннинг инвестицион салоҳиятини халқаро ҳамжамиятга тақдим этиш катта шараф эканини таъкидлади. Унга кўра, 2017 йилда бошланган ислоҳотлар мамлакат иқтисодиётида туб ўзгаришларга замин яратди, халқаро ҳамкорлик ва инвестициялар учун кенг имкониятлар очилди. Юксак малакали ва ёш аҳолининг салоҳияти, шунингдек, бизнесни қўллаб-қувватловчи ҳукумат сиёсати туфайли Ўзбекистон янги тармоқлар — алоқа, молия, транспорт ва энергетика соҳаларида жадал ўсишни таъминламоқда. Шунингдек, халқаро инвесторлар билан очиқ мулоқотнинг ривожланаётгани ҳам муҳим омил сифатида қайд этилди.

Ўз навбатида, Templeton Global Investments компаниясининг Марказий Осиё бўйича бош директори Мариус Дан Ўзбекистон бугунги кунда дунёдаги энг тез ривожланаётган иқтисодиётлардан бирига айланганини ва бу тенденция келгусида ҳам давом этишига ишонч билдирди. У UzNIF портфелидаги компаниялар мамлакат иқтисодиётининг асосий йўналишларини — энергетика, коммунал хизматлар, банк-молия тизими ва транспорт соҳасини қамраб олишини қайд этди. Бу эса инвесторлар учун Ўзбекистон иқтисодиётининг ички тузилмаси ва узоқ муддатли ривожланиш истиқболларини янада чуқурроқ англаш имконини беради.

“Инвестор куни” тадбири Ўзбекистоннинг инвестицион жозибадорлигини ошириш, халқаро инвесторлар билан мулоқотни мустаҳкамлаш ҳамда мамлакат иқтисодиётининг янги истиқболли йўналишларини кенг тарғиб этиш йўлида муҳим қадамлардан бири бўлди.