Ўзбекистон ва Жанубий Корея ўртасида олий таълим соҳасидаги ҳамкорликни янада кенгайтириш масалалари муҳокама қилинди.

Учрашувда томонлар олий таълим соҳасидаги ҳамкорликнинг бугунги ҳолати ва уни ривожлантиришнинг истиқболли йўналишлари юзасидан фикр алмашдилар.

Қўнғиротбой Шарипов икки мамлакат ўртасида олий таълим йўналишидаги муносабатлар муваффақиятли ривожланаётганини таъкидлади. У мамлакатимизда фаолият юритаётган 4 та Жанубий Корея университетлари филиаллари, корейс тили ва адабиёти бўйича тайёрланаётган мутахассислар, 180 нафардан ортиқ талаба таҳсил олаётган қўшма таълим дастурлари, шунингдек, талабаларнинг ўзаро академик мобиллиги ҳақида тўхталди.

Мулоқотда транспорт, машинасозлик, архитектура, геология, қайта тикланадиган энергия манбалари, “яшил иқтисодиёт” ва касб-ҳунар таълими соҳаларида ҳамкорликни кенгайтириш, Жанубий Корея университетларидан мутахассисларни жалб этиш, илмий-амалий марказлар, технопарклар ташкил этиш каби йўналишларда лойиҳаларни амалга ошириш юзасидан таклифлар билдирилди.

Шунингдек, Корея халқаро ҳамкорлик агентлиги (KOICA) билан кўнгилли ўқитувчиларни жалб қилиш ва таълим соҳасида қўшма лойиҳаларни ривожлантиришга доир масалалар муҳокама қилинди.

Учрашувда томонлар муҳандислик ва ахборот технологиялари соҳалари бўйича эълон қилинган халқаро грант дастурида ўзбекистонлик талабалар иштирокини янада кенгайтириш, уларнинг ушбу имкониятлардан самарали фойдаланишини таъминлаш мақсадида амалий чора-тадбирларни белгилаб олдилар. Шу доирада, олий таълим муассасалари билан ҳамкорликни мустаҳкамлаш, талабаларни хабардор қилиш, зарур методик кўмак бериш ва уларни тайёрлаш жараёнларини тизимли йўлга қўйиш масалаларига алоҳида эътибор қаратилди.

Шу билан бирга, муҳандислик ва техник йўналишлар бўйича ўзбекистонлик талабалар учун Жанубий Корея университетларида стипендиялар ажратиш имкониятларини ўрганиш таклифи ҳам илгари сурилди.

Томонлар ушбу мулоқотни амалий ҳамкорликка айлантириш бўйича аниқ чора-тадбирларни белгилаб, ўзаро алоқаларни янада фаоллаштиришга келишиб олдилар.