Олий таълим, фан ва инновациялар вазири JICA бош директори ўринбосари билан музокаралар ўтказди

Томонлар Ўзбекистон-Япония ёшлар инновация марказининг институционал бошқаруви ва мустақил ривожланиш салоҳиятини кучайтириш масаласида музокаралар олиб бордилар.

Учрашувда Ўзбекистон-Япония ёшлар инновация марказини ривожлантириш дастурининг 1-босқичида амалга оширилган ишлар натижалари муҳокама қилинди ҳамда лойиҳанинг 2-босқичига старт беришга келишилди. Шунингдек, JICA агентлиги билан ҳамкорликни кенгайтириш, таълим жараёнига ўқитувчи кўнгиллиларни жалб этиш, қисқа муддатли ўқув дастурлари ва курсларини ташкил этиш, таълим йўналишида истиқболли қўшма лойиҳаларни амалга ошириш каби масалалар кўриб чиқилди.

Таъкидлаш жоизки, Япония халқаро ҳамкорлик агентлиги (JICA)нинг Техник ҳамкорлик лойиҳасининг I-босқичи доирасида Япониянинг Нагоя, Сукуба, Кеё, Акита, Кюшу, Тейкио, Ёкохама университетлари ҳамда Токио, Нагоя, Шибаура технология институтларида 15 нафар ёш илмий тадқиқотчилари малака ошириш ва магистратура ҳамда докторантура PhD босқичларида таҳсил олишди. MIRAI жамғармаси маблағлари ҳисобидан 9 та илмий тадқиқотлар амалга ошириш учун маблағлар ажратилди. Бундан ташқари, кўплаб халқаро конференсиялар, семинарлар, тренинглар ташкил этилди, Япониянинг қатор нуфузли олий таълим муассасалари ҳамда илмий тадқиқот институтлари билан ҳамкорлик меморандумлари имзоланди.