Яшил иқлим жамғармаси бош директори Мафальда Дуарте билан учрашув

Мафальда Дуарте Ўзбекистон Республикаси Президенти Шавкат Мирзиёев томонидан олиб борилаётган кенг кўламли ислоҳотлар натижасида мамлакатимиздаги барча соҳалар барқарор ривожланаётганини эътироф этди.

Шу билан бирга, Яшил иқлим жамғармаси ижрочи директори “яшил” молиялаштиришни ривожлантириш, иқлимга мослашиш ва атроф-муҳитни муҳофаза қилиш бўйича ислоҳотларни қамраб олувчи “Ўзбекистон – 2030” стратегиясида белгиланган муайян мақсадлар нафақат Ўзбекистон учун жуда муҳим, балки бошқа давлатлар учун ҳам аҳамиятга молик эканини билдириб, мамлакатимизда иқлим ўзгариши таҳдидларининг хавф-хатарлари тўғри талқин қилинаётгани ва илмий тадқиқотлар асосида тегишли зарур чоралар кўрилаётганини юқори баҳолади.

Учрашувда иқлим ўзгаришига мослашиш ва унинг оқибатларини юмшатишга қаратилган қўшма лойиҳа ва дастурларни амалга ошириш бўйича ҳамкорликни янада мустаҳкамлаш масалалари юзасидан атрофлича фикр алмашилди.

Шунингдек, мамлакатимизда Яшил иқлим жамғармасининг минтақавий ваколатхонасини очиш, Жамғарма билан биргаликда инновацион кўкаламзорлаштириш ва ерларни барқарор бошқариш лойиҳаларини ишлаб чиқиш ҳамда Оролбўйида ижтимоий-экологик вазиятни яхшилаш, жамғарманинг молиявий ресурсларидан унумли фойдаланиш, “Green” университети билан қўшма таълим дастурларини ишлаб чиқиш сингари масалалар ҳам муҳокама қилинди.