Тошкент шаҳрида Ritz-Carlton қурилиши
2025-05-27 14:50:00 / Янгиликлар
Жорий йилнинг 27 май куни Ўзбекистон Республикаси Инвестициялар, саноат ва савдо вазири Лазиз Кудратов Озарбайжоннинг “PASHA Real Estate” компанияси ва АҚШнинг “Marriott International” халқаро меҳмонхона оператори раҳбариятини қабул қилди.
Суҳбатда Тошкент шаҳрида Ritz-Carlton бренди остида қиймати 200 миллион долларлик замонавий беш юлдузли меҳмонхона ва турар жой мажмуаси қуриш лойиҳасининг бориши муҳокама қилинди.
Ҳозирда лойиҳа доирасида Британиянинг Benoy компанияси билан ҳамкорликда объектнинг бош режаси ишлаб чиқилиб, ер қазиш ишлари тўлиқ якунланди, 300 000 м³ тупроқ олиб ташланди, периметри бўйлаб қозиқлар ўрнатилиб, пойдевор қуйиш ишлари бошланди.
Учрашув якунида томонлар лойиҳани ўз вақтида ва сифатли амалга ошириш учун барча зарур чораларни кўришга келишиб олдилар ҳамда ҳамкорликни янада кенгайтириш ва янги қўшма лойиҳаларни ҳаётга татбиқ қилишга ўзаро тайёр эканликларини билдирдилар.