Япония Ташқи савдо ташкилоти раиси ва бош директори билан ҳамкорликни ривожлантириш масалалари муҳокама қилинди
2025-05-19 09:45:00 / Янгиликлар

Учрашувда Япония ва Ўзбекистон ўртасидаги ҳамкорликни ривожлантириш масалалари юзасидан фикр алмашилди.
Шубилан бирга, Ўзбекистон томонидан мамлакатнинг IT ва муҳандислик аутсорсинг соҳаларидаги имкониятлари, IT Park Uzbekistan томонидан тақдим этилаётган солиқ ва визавий имтиёзлар, кадрлар тайёрлаш дастурлари, шунингдек Япония компаниялари учун яратилаётган қулай шарт-шароитлар ҳақида батафсил маълумот берилди.
Учрашувнинг асосий мақсадларидан бири сифатида Ўзбекистоннинг янги IT ва муҳандислик аутсорсинг манзили сифатидаги салоҳиятини тақдим этиш, кадрлар салоҳияти ва халқаро IT мутахассислар алмашинувини йўлга қўйиш масалалари муҳокама қилинди.
Ўз навбатида, JETRO Ўзбекистондаги инсон капитали салоҳиятини юқори баҳолаб, Япония компаниялари ўзбекистонлик мутахассислар билан ишлаш самарадорлигини аллақачон ҳис қилганини таъкидлади.
Япония компанияларини халқаро стартаплар билан боғлашга қаратилган "J-Bridge" дастури ҳақида маълумот берилди. Шунингдек, таълим соҳасидаги ҳамкорлик зарурлиги таъкидланиб, Ўзбекистондаги ёш мутахассисларнинг рақобатбардошлигини ошириш учун сифатли таълим муҳимлиги қайд этилди. Бу йўналиш сўнгги йилларда давлат сиёсатининг устувор йўналишларидан бирига айлангани алоҳида эътироф этилди.
JETRO кўмагида илк бор ICT WEEK 2025 доирасида Ўзбекистонда Япония павилёнини ташкил этиш ташаббуси муҳим аҳамият касб этиши таъкидланиб, бунинг учун миннатдорчилик билдирилди.